प्युठान,साउन २६। प्युठान नगरपालिका–३ सापडाडाका अति विपन्न तथा शारीरिक रूपमा अति अशक्त दिलिप सुनारलाई जिल्ला प्रशासन कार्यालय प्युठानले घरमै पुगेर नागरिकता प्रदान गरेको छ।
वडा कार्यालयको सिफारिस र पहलमा प्रमुख जिल्ला अधिकारी दिपकराज नेपाल र प्रशासकीय अधिकृत शरद गौतमसहितको टोली आइतबार दिलिपको घरमै पुगेको हो।
वडा अध्यक्ष सुमनराज श्रेष्ठले घरमै सेवा पुर्याउन सहजीकरण गरेकोमा प्रशासनलाई धन्यवाद दिँदै भने, “वडा सधैं जनताको सेवामा तल्लिन रहनेछ।”
नागरिकता पाएपछि दिलिपकी आमा कलि सुनारसहित गाउँलेले वडा कार्यालय र प्रशासनको मानवीय पहलप्रति आभार व्यक्त गरेका छन्।
स्थानीय बासिन्दाले यो कदमले अशक्त तथा सेवा लिन कठिनाइ हुने नागरिकका लागि राज्यको पहुँच प्रत्यक्ष घरमै पुर्याउने प्रेरणादायी उदाहरण पेश गरेको टिप्पणी गरेका छन्।
