काठमाण्डौ । अन्तरिम सरकार गठनको प्रक्रिया र सम्भावनाबारे राजधानीमा छलफल तीव्र बनेको छ । तर हालसम्म ठोस निष्कर्षमा पुगिएको छैन।
आज दिउँसो राष्ट्रपति रामचन्द्र पौडेललाई भेट्न प्रधानसेनापति अशोकराज सिग्देल शीतलनिवास पुगेका थिए। तर राष्ट्रपति पौडेल, प्रधानसेनापति सिग्देल र ‘जेन–जी’ प्रतिनिधिहरूबीच त्रिपक्षीय भेटवार्ता नबन्ने देखिएपछि सिग्देल शीतलनिवास छोडेर फेरि राष्ट्रपति कार्यालय पुगेका छन्।
यसअघि राष्ट्रपति पौडेलले समाधानको बाटो खोज्न प्रधानन्यायाधीश, सभामुख र राष्ट्रियसभाका अध्यक्षसँग परामर्श गरेका थिए। साथै अन्तरिम सरकार गठनबारे सरोकारवालासँग छलफल गर्ने जिम्मा आफ्ना सल्लाहकारलाई दिएका छन्।
गत राति पूर्वप्रधानन्यायाधीश सुशीला कार्कीको नेतृत्वमा अन्तरिम सरकार बनाउन सहमति जुटिसकेको बताइन्छ। अन्य विषयमा प्रायः टुंगो लागे पनि ‘जेन–जी’ पक्षले संसद् विघटन आवश्यक भएको अडान राख्दै आएको छ।
अहिले अन्तरिम सरकार र संसद् सम्बन्धी संवैधानिक प्रक्रिया कसरी अघि बढाउने भन्ने विषयमा परामर्श तीव्र छ। संविधानअनुसार सांसदबाहेकका व्यक्तिलाई प्रधानमन्त्री बनाउन सकिँदैन। निष्कर्ष आएपछि मात्र सबै पक्षबीच प्रत्यक्ष सहमति गर्ने तयारी भइरहेको छ।
मंगलबार ‘जेन–जी’ आन्दोलन चर्किँदै गएपछि तत्कालीन प्रधानमन्त्री केपी शर्मा ओलीले पदबाट राजीनामा दिएका थिए।
