झइन्द्र भण्डारी
प्यूठान, साउन २२ । कोरानाको महामारीबिच सुरू भएको नयाँ वर्ष २०७७ को ४ महिना बित्नै लाग्दासम्म पनि अहिलेसम्म नेपालका किसानहरूले निकै ठूलो समस्या भोग्दै आउनु परेको छ ।
कोरोनाको नियन्त्रणको लागि गरिएको लकडाउनले व्यवसायी तथा जागीरेहरूलाई पनि समस्यामा पारेर आर्थिकमन्दी त लगायो नै त्यसभन्दा बढी पीडित बने किसान मजदुरहरू ।
कोरोनाको महामारी लकडाउनको समस्याबिच जसोतसो खेती किसान गरि आफ्नो परिवारको जीविकोपार्जन गर्ने सपना बोकेर खेती गरेका किसानलाई सलह किराले निकै सतायो ।
कतै खेती गरेर उब्जाएको अन्नबाली खेतबारीमै सलहले सत्यनास नै बनायो कतै किसानहरूले ढ्याङ्ग्रो ठटाएर, आगो बालेर दिनभर खेतबारी मै कुरेर खेतीबाली केही जोगाए तर दिनमा सलहबाट सके जति बचाएका किसानको बाली रातमा बँदेल लगाएतका जंगली जनावरले मासिदिए ।
यसरी अहोरात्र खटेर जेनतेन धेरैले थोरै भए पनि जोगाएको मकैबाली आज आएको हुरी बतासले भाचिदिएर ढालिदिएर बारीमै सुताईदियो यसले किसान थप पिडित बनेका छन् ।
स्वर्गद्वारी नगरपालिका प्यूठानका लेक तथा डाडाकाडामा रहेका बस्तीका मकै आज बिहिवार आएको हुरीले सत्यानास नै बनाउदा यो संकटको अवस्थामा किसानको जसोतसो परिवार पाल्ने सपना फेरि पनि मरेको छ ।
स्वर्गद्वारी नगरपालिका वडा नम्बर ६ बेल्बासमा बुधबार साझ देखि चलेको हुरीले गाउँभरको बारीमा रहेको मकै ढालेर केही पनि ठाडो बोट नरहेको स्थानीय किसान तथा शिक्षक बसन्त कालाथोकी तथा बिष्णु भण्डारीले जानकारी दिए ।
कृषक फनाधर भण्डारीले केही दिन अघिसम्म दिनमा सलह तथा रातमा बदेलबाट जेनतेन सकेजती जोगाएको मकैबाली पछिल्लो २४ घण्टादेखी चलेको हुरीले सखाप पारेको भन्दै पीडा पोखे । उनले भने –“कोरोनाको कारणले आर्थिक समस्यामा परेका हामी किसानलाई सलह, बदेल हुँदै हुरीले पनि छोडेन । अब भएको बालीनाली यी सवै प्रकोपले सक्कायो न त जागीर नै छ अब परिवार कसरी पाल्ने भन्ने चिन्ताले आनन्दले निद्रा पनि लाग्दैन” ।
किसान एकपछि अर्को मारमा परेको यो संकटको अवस्थामा स्थानीय तथा प्रदेश सरकारले किसानका यी घाउमा केही मलमपट्टि गर्नेछ । सम्बन्धित निकाय तथा सरोकारवालाको ध्यान यता जानेछ । हामी यहि कामना गरौं ।
