काठमाडौं,कात्तिक १६ । प्रहरीले मोरङ, ललितपुर, दाङ, काठमाडौं र भक्तपुरबा ५० जुवाडे पक्राउ गरेको छ । पछिल्लो चौबीस घण्टामा प्रहरीले ती जुवाडेलाई पक्राउ गरेको हो ।
मोरङ, केराबारी गाउँपालिका ६ बस्ने भुपेन्द्र भट्टराईको घरमा तास खेलिरहेको अवस्थामा ५ जनालाई ८ लाख ८९ हजार २ सय ५० रुपैयाँ र १३ बुक ताससहित प्रहरीले पक्राउ गरेको छ ।
दाङ आइतबार घोराहीमा जुवा खेल्ने पाँच जना पक्राउ परेका छन् । घोराही उपमहानगरपालिका–१८ नवलपुरस्थित एक निर्माणाधीन घरमा जुवा खेलिरहेको सूचना पाएपछि पुगेको प्रहरीले आइतबार बिहान ३ लाख २३ हजार ६० रुपयाँ नगदसहित उनीहरुलाई पक्राउ गरेको जिल्ला प्रहरी प्रमुख एसपी गणेश चन्दले बताए ।
पक्राउ पर्नेहरुमा घोराही–१० का २६ वर्षीय अनिलकुमार थापा, २५ वर्षीय केशव डाँगी, २६ वर्षीय कमल रावत, घोराही १५ का २७ वर्षीय वसन्त भण्डारी र घोराही–१८ का ३६ वर्षीय धर्म ज्ञवाली छन् ।
भक्तपुर १०, कमलविनायक बस्ने माधव सुवालको घरमा तास खेलिरहेको अवस्थामा माधवलगायत १२ जनालाई प्रहरीले पक्राउ गरेको छ । उनीहरुलाई नगद १ लाख ९० हजार ५ सय रुपैयाँ र ७ बुक तास बरामद भएको छ ।
काठमाडौं महानगरपालिका १५, विजेश्वरीमा तास खेलिरहेको अवस्थामा सोही ठाउँ चमति बस्ने काभ्रेको रोशी गाउँपालिका घर भएका २२ वर्षीय विक्रम लामासमेत १० जनालाई प्रहरीले पक्राउ गरेको छ । महानगरीय प्रहरी वृत्त स्वयम्भूबाट खटिएको प्रहरीले उनीहरुलाई नगद १ लाख ५३ हजार ५ सय रुपैयाँ र ६ बुक ताससहित पक्राउ गरेको हो ।
यस्तै ललितपुरको महालक्ष्मी नगरपालिका ७, चांगाथलीस्थित शंखर बस्नेतको घरमा कौडा खेलिरहेको अवस्थामा भक्तपुर सूर्यविनायक नगरपालिका २ बस्ने ४९ वर्षीय सुरेश पौडेललगायत १८ जनालाई प्रहरीले पक्राउ गरेको छ । उनीहरुको साथबाट ११ लाख ५४ हजार ५ सय ७५ रुपैयाँ र १६ थान कौडा बरामद भएको प्रहरीले जनाएको छ ।
