काठमाडौं, मंसिर १३ । रुकुम पश्चिममा जन्ती चढेको जिप दुर्घटना हुँदा पाँचजनाको मृत्यु भएको छ । शुक्रबार राति आठबीसकोट नगरपालिका–७ को पोखरामा रा १ ज ५८९ नम्बरको जिप दुर्घटना भएको हो ।
आठबीसकोट नगरपालिका वडा नम्बर ८ को दाजेबाट १०–१२ जना जन्ती बोकेर वडा नम्बर १० को घारीखोला फर्किरहेको रा १ ज ५८९ नम्बरको जिप दाजेमा दुर्घटना भएको हो ।
दुर्घटनामा मृत्यु हुनेहरुमा आठबीसकोट नगरपालिका ८ का कलिभान नेपाली, ४८ वर्षीय आइते चनारा, ५१ वर्षीय गोरे नेपाली, ६६ वर्षीय सार्के नेपालीको घटनास्थलमै र वडा नम्बर ८ कै ५८ वर्षीय लालबहादुर नेपालीको उपचारको क्रममा मृत्यु भएको जिल्ला प्रहरी प्रमुख तथा प्रहरी नायब उपरीक्षक ठगबहादुर केसीले जानकारी दिए ।
जिप चालक वडा नम्बर ९ का डिल्लीबहादुर नेपाली फरार रहेको र खोजी भइरहेको प्रहरीले जनाएको छ । जिप सडकबाट झन्डै १ सय मिटर तल खसेको प्रहरीले बताएको छ ।
