काठमाडौँ, पुस १७ । आज (शुक्रवार) आठौँ राष्ट्रिय पोशाक दिवस विभिन्न कार्यक्रम गरी मनाईएको छ ।आज जनवरी १ अर्थात् अंग्रेजी नयाँ वर्ष हो। नेपालमा विक्रम संवत्अनुसार नयाँ वर्ष मनाउने चलन भएकाले नेपाली युवाहरुले जनवरी १ मा भने नेपाली राष्ट्रिय पोसाक लगाएर त्यहीअनुसार मनाउँदै आएका छन्।
‘हाम्रो शान हाम्रो स्वाभिमान राष्ट्रिय पोशाक हाम्रो पहिचान’ भन्ने मुल नाराका साथ शुक्रवारआठौँ राष्ट्रिय पोशाक दिवस मनाईएको हो । राष्ट्रिय धरोहर संरक्षण प्रतिष्ठान नेपालले काठमाडौंको माइतीघर मण्डलामा विशेष कार्यक्रम गरी राष्ट्रिय पोशाक दिवस मनाएको छ । अंग्रेजी नयाँ वर्षको पहिलो दिन समेत पर्ने यस दिनमा देश विदेशमा छरिएर रहेका नेपालीहरुले नेपाली पोशाक दौरा सुरुवाल, टोपी, गुन्युचोली लगाएर प्रचार प्रसार गर्ने गरेका छन् ।
बि.सं. २०७० साल पौष १७ गते गतेदेखि यस दिनलाई राष्ट्रिय पोशाक दिवसका रुपमा मनाउन थालिएको हो । यस दिवसको संयोजन गर्दै आएका राष्ट्रिय धरोहर संरक्षण प्रतिष्ठान नेपालका संस्थापक अध्यक्ष राजानन्द माण्डव्यले नेपाली मौलिकता तथा संस्कृतिलाई विदेशी संस्कृतिले धरासयी बनाउन लागेको अवस्थामा नेपाली संस्कृति र सभ्यतालाई विश्वभर उजागर गर्न राष्ट्रिय पोशाक दिवसको सुरुवात गरिएको बताए । सरकारले नेपालको सबै जातजाति, भाषा, धर्म, संस्कृतिलाई प्रतिनिधित्व गर्ने साझा पोशाक घोषणा गर्नुपर्ने पनि उनले बताए ।
संघीय राजधानी काठमाडौंको माइतीघरमा युवाहरु राष्ट्रिय पोसाक दौरासुरुवाल, टोपी लगाएर ब्यानरसहित भेला भएका थिए। युवायुवतीहरुले ढाका टोपी पहिरिएर, गुन्युचोलो लगाएर, राष्ट्रिय झण्डा बोकेर यो दिवस मनाएका हुन्। यो दिवस युवाहरुले स्वतः रुपमा मनाउनथालेका छन्। यो आठौँ राष्ट्रिय पोसाक दिवस हो।
यस दिन देश विदेशमा छरिएर रहेका नेपालीहरुले स्वस्फुर्त रुपमा दौरासुरुवाल तथा गुन्युचोली लगाएर विभिन्न कार्यक्रमहरुमा भागलिने तथा सामाजिक सञ्जालमा प्रचारप्रसार गर्दै आएका छन् ।
