काठमाडौं,फाल्गुन १७ । पूर्वप्रधानमन्त्री एवम् जसपाका संघीय परिषद्का अध्यक्ष डा. बाबुराम भट्टराईको न्युरो इन्डोक्राइनको ट्युमरमा क्यान्सर नभएको निष्कर्ष चिकित्सकले निकालेका छन्।
भारतको नयाँ दिल्लीस्थित यकृत एवं पित्त विज्ञान संस्थानमा स्वास्थ्य परीक्षणको क्रममा पेटमा ट्युमर भेटिएको हो।
वायोप्सी, डोटा नोक परीक्षण, इन्डोस्कपी अल्ट्रासाउन्ड, पीइटी सिटी स्क्यानसहित अन्य परीक्षणपछि चिकित्सकहरुले ट्युमरमा क्यान्सर नभएको प्रमाणित गरेकाे उनका स्वकीय सचिव विश्वदीप पाण्डले जानकारी दिए।
चिकित्सकले अहिले देखिएको ट्युमरलाई भने बेलैमा नै ढिला नगरी दुई/तीन महिनाभित्रै शल्यक्रियाद्वारा फाल्नुपर्ने चिकित्सकले सुझाव दिएकाे उनको भनाइ छ।
बेलैमा शल्यक्रिया नभएमा भने क्यान्सरको खतरा पनि हुन सक्ने कुरामा चिकित्सकले सचेत गराएका छन्।
भट्टराईको फेब्रुअरी २२ बाट भारतको दिल्लीस्थित यकृत एवं पित्त विज्ञान संस्थानमा स्वास्थ्य परीक्षण भइरहेको थियो। उनले डा प्रोफेसर विक्रम भाटियासँग परामर्श लिएका थिए।
भट्टराई भोलि फागुन १८ गते मंगलबार नेपाल वायुसेवाको जहाजबाट नेपाल फर्कनेछन्।
