काठमाडौँ । कोरोना भाइरसको नयाँ भेरियन्ट ‘ओमिक्रोन’ले कोरोना महामारीलाई नयाँ चरणमा लगेको बताउँदै चाँडै नै यो महामारी अन्त्य हुने विश्व स्वास्थ्य संगठनले जनाएको छ ।
विश्व स्वास्थ्य संगठनका महानिर्देशक हान्स क्लुगले भने, ‘ओमिक्रोनले युरोपलाई महामारी अन्त्यको खेलतर्फ लग्दैछ,’ उनका अनुसार मार्चसम्म भने ओमिक्रोनबाट ६० प्रतिशत युरोपेलीहरू संक्रमित हुने छन् ।
विश्वभर महामारीको रुपमा फैलिएको यस भाइरस र यसका नयाँ भेरियन्टले सम्पूर्ण युरोपलाई ढाकेको र केही महिनापछि शान्त रहने उनको विश्वास छ । खोपका कारण विश्वव्यापी रुपमा मानिसहरुको रोग प्रतिरोधात्मक क्षमता बढेको समेत उनले बताए । ‘तर, यस वर्षको अन्त्यसम्ममा विश्व शान्त बन्नेछ,’ उनले भने।
अमेरिकाका वरिष्ठ वैज्ञानिक एन्थोनी फाउसीले पनि कोभिड संक्रमण विस्तारै विश्वबाटै घट्दै जाने विश्वास गरेका छन् । अमेरिकामा कोभिड संक्रमण विस्तारै घट्दो क्रममा छ।
यतिबेला कोरोनाको नयाँ भेरियन्ट ‘ओमिक्रोन’ सँगै यसको नयाँ सह-भेरियन्टसमेत भेटिएको छ । बेलायतमा भेटिएको नयाँ प्रजाति ओमिक्रोन बीए.२ लाई थप अनुसन्धानमा राखिएको बेलायतको स्वास्थ्य सुरक्षासम्बन्धी निकाय (युकेएचएसए) ले जनाएको छ ।
वैज्ञानिकहरु भने यो नयाँ प्रजातिको बारे अझै निश्चित हुन सकेका छैनन् । सहप्रजातिबारे थप विश्लेषण गरिने युकेएचएसएले जनाएको छ ।
