काठमाडौँ, वैशाख २ । लुम्बिनी प्रदेशमा ५ दलीय गठबन्धनले स्थानीय तहको निर्वाचनको भागबन्डा वैशाख ६ गतेसम्म टुंग्याउने निर्णय गरेका छन्। शुक्रबार बुटवलमा बसेको ४ उपमहानगर( ३२ नगरपालिका सहित १०९ वटा स्थानीय तहको भागबन्डा टुंग्याउने निर्णय गरेका हुन्।
बैठकमा वैशाख ४ गतेभित्र केन्द्र र प्रदेशको सर्कुलरलाई आधार बनाई सहमति गरी प्रदेशमा पठाउने निर्णय भएको छ। वैशाख ५ गते १०९ वटै पालिकाको भागबण्डा मिलाउन प्रयत्न गर्ने र मिल्न नसकेका विवादित विषयमा सबै जिल्लाहरुमा नेपाली कांग्रेसले समन्वय गर्ने निर्णय भएको नेपाली कांग्रेस लुम्बिनीका सभापति अमरसिंह पुनले बताए। ५ गतेसम्म सहमति हुन नसकेका र नमिलेका विषय समेत उल्लेख गरी ५ दलको बैठकले निर्णय गरेर केन्द्रलाई जानकारी गराउने निर्णय भएको छ। ६ गतेभित्र केन्द्रीय निर्देशन अनुसार विवादित सबै पालिकाको टुंगो लगाउने निर्णय भएको हो।
बैठकपछि पत्रकारसँग कुरा गर्दै नेकपा एकीकृत समाजवादीका लुम्बिनी प्रदेश अध्यक्ष मेटमणि चौधरीले ५ दलीय गठबन्धन प्रतिगमनविरुद्ध मुलुकको आवश्यकताले बनेको बताउँदै इमान्दारितापूर्वक लागु हुने बताए। प्रदेशका १०९ वटै पालिका गठबन्धनले जित्ने उनको दाबी छ। एमालेले जितेका ४३ मध्ये कम्तीमा आधा पालिका र ४ वटा उपहानगरपालिका मध्ये एक वटामा आफूहरुको दाबी रहेको बताए।
