काठमाडौँ, वैशाख ८ । ब्यारेकभित्रै गोली लागेर घाइते भएकी सैनिक जवानको उपचारको क्रममा मृत्यु भएको छ।
कपिलवस्तुको गोरुसिंहेस्थित शमसेर दल गणमा कार्यरत सैनिक जवान कोपिला राजवंशीलाई बुधबार राति गोली लागेको अवस्थामा अस्पताल ल्याइएको थियो।झापाको गौरादह नगरपालिका वडा नं। १ की २४ वर्षीय राजवंशी केही दिन अघिमात्रै गोरुसिंहेस्थित शमसेर दल गणमा सरूवा भएर आएकी थिइन्।
गणभित्रको पोष्टमा कार्यरत राजवंशीलाई बुधबार साँझ ७ बजेतिर गोली लागेर गम्भीर घाइते भएको अवस्थामा बुटवलस्थित लुम्बिनी प्रादेशिक अस्पतालमा ल्याइएकोमा त्यहाँ उपचार सम्भव नभएपछि भैरहवास्थित युनिभर्सल कलेज अफ मेडिकल साइन्सेजमा लगिएको थियो।
भैरहवाबाट पनि थप उपचारको लागि काठमाडौं लैजाने तयारी गरिए पनि लैजान नपाउँदै युनिभर्सल कलेज अफ मेडिकल साइन्सेजमै मृत्यु भएको अस्पताल स्रोतले जनाएको छ।
