काठमाडौं, वैशाख ९। नेपाल ग्रामीण चलचित्र महोत्सवमा चलचित्र ‘टुल्की’लाई उत्कृष्ट फिचर चलचित्रको अवार्ड प्रदान गरिएको छ ।
गोरखाको धार्चे गाउँपालिका –४ लाप्राकमा सेलिब्रेटी नेपालले आयोजना गरेको उक्त महोत्सवमा जुरी टिमले उत्कृष्ट फिचर चलचित्रतर्फ अवार्ड आर.पि. कर्माचार्य र शेखर लामाको निर्मित तथा देवजंग थापा निर्देशित चलचित्र ‘टुल्की’लाई प्रदान गरिएको हो । यस्तै ‘स्क्रिन प्ले’तर्फको अवार्ड ‘टुल्की’बाटै शेखर लामालाई प्रदान गर्रिएको थियो ।
भाषाभाषी विधामा प्रितम गुरुङ निर्देशित तथा आइतराम गुरुङ निर्मित गुरुङ चलचित्र ‘फुङ’लाई अवार्ड प्रदान गरियो । त्यस्तै, डकुमेन्ट्री विधामा भिमलाल श्रेष्ठ निर्देशित ‘मकै विवाह’ले अवार्ड प्राप्त गर्यो भने सर्टफिल्म विधामा केदार श्रेष्ठ निर्देशित ‘जुनुको जुत्ता’ले अवार्ड जित्यो ।
सर्वोकृष्ट अभिनेतामा ‘चिसो आत्मा’बाट प्रविन खतिवडा र अभिनेत्रीतर्फ ‘मौन प्रतिशोध’बाट शारदा अधिकारीले अवार्ड प्राप्त गरे । उत्कृष्ट निर्देशकतर्फ ‘टिष्टापारीको साईनो’बाट खिलबहादुर गुरुङले अवार्ड प्राप्त गरे । सिन सुमेश श्रेष्ठ निर्देशित सर्टफिल्म ‘मौन प्रतिशोध’लाई जुरी अवार्ड प्रदान गरियो ।
महोत्सवमा विभिन्न भाषामा बनेका सांस्कृतिक चलचित्र, वृत्तचित्र, सर्टमुभी, फिचर फिल्मसमेत गरी १६ वटा फिल्म प्रदर्शन गरिएको आयोजक संस्थाका अध्यक्ष रघुनाथ सापकोटाले बताए ।
