काठमाडौँ, असार ११ । अविरल परेको मुसलधारे वर्षाका कारण पोखरा २५ हेमजाको सुइँखेत फाँटका घरहरु डुबानमा परेका छन् । वडाध्यक्ष मोतीराज तिमिल्सिनाका अनुसार ६०० घर प्रभावित भएका छन् । थुप्रै घरका मानिसलाई अन्त सार्नुपरेको जानकारी वडाध्यक्ष तिमिल्सिनाले दिए ।
घर गोठ र कृषि फर्महरु बाढीको डुबानमा परेका छन् । वरिपरिका डाँडाबाट पहिरो पनि खसेको छ । राति ११ बजेदेखि नै घरहरु डुबानमा परेर ती घरका मानिसहरु आफन्तकहाँ र वरपरका सार्वजनिक स्थानमा सर्नुपरेको जानकारी वडाध्यक्ष तिमिल्सिनाले दिए । ‘उद्धार कार्यमा छौं,’ उनले भने ।
सुइँखेत खोलामा आएको ठूलो बाढीले निकास नपाउँदा फाँटका घरहरु पुरिएका थिए । अहिले भने विस्तारै पानी घट्दै गइरहेको वडाध्यक्ष तिमिल्सनाले बताए ।
यसैबीच गण्डकी प्रदेशका केही स्थानमा आज शनिबार भारी वर्षाको सम्भावना रहेको जल तथा मौसम विज्ञान विभागले जानकारी दिएको छ। देशका बाँकी स्थानमा भने हल्कादेखि मध्यम वर्षाको सम्भावना रहेको छ।
