बुटवल, मंसिर २८। जन्मदिनको अवसरमा तडकभडक र खर्चिलो पार्टी गर्ने प्रवृत्तिलाई चुनौती दिदै अनेरास्ववियू (क्रान्तिकारी) की नेतृ ज्योती थापा मगरले सामाजिक उत्तरदायित्वलाई प्राथमिकतामा राखेर बुटवल-१४ स्थित लुम्बिनी अपाङ्ग दृष्टिविहीन अनाथ आश्रममा शैक्षिक सामग्री वितरण गरेकी छिन्।
आश्रममा रहेका १७ जना बालबालिकालाई कापी, कलम, पेन्सिल, इरेजरलगायत शैक्षिक सामग्री प्रदान गर्दै नेतृ थापाले आफ्नो जन्मदिनलाई उदाहरणीय बनाउन सफल भएकी छिन्।
हाल बुटवल सिटी क्याम्पसमा बीए एलएलबी सातौं सेमेस्टरमा अध्ययनरत नेतृ थापाले जन्मदिनको अवसरलाई सामाजिक र रचनात्मक कार्यमार्फत मनाउन सबै युवा विद्यार्थीलाई प्रेरणा दिन खोजेको बताइन्।
उनले पश्चिमी संस्कृतिको प्रभावमा जन्मदिनलाई खर्चिलो र तडकभडकपूर्ण तरिकाले मनाउनु समाज, राष्ट्र, र भावी पुस्ताका लागि घातक हुने बताउँदै युवा विद्यार्थीहरूलाई सामाजिक कार्यमा सक्रिय हुन आग्रह गरिन्।
कार्यक्रममा अनेरास्ववियू (क्रान्तिकारी) रुपन्देही जिल्ला अध्यक्ष टिकाराम आचार्य, जिल्ला कोषाध्यक्ष केशव पौडेल, बुटवल नगर समिति अध्यक्ष गगन रेस्मी लगायतको उपस्थिति थियो।
