प्युठान । साउन १५ गते खीर खाने परम्परागत पर्वको अवसरमा देशभर झन्डै ८० लाख लिटर दूध खपत हुने अनुमान गरिएको छ।
नेपाल डेरी एसोसिएसनका अनुसार यो दूध खपतसँगै करिब एक अर्ब ४० करोड रुपैयाँ बराबरको कारोबार हुने सम्भावना रहेको छ।
एसोसिएसनका अध्यक्ष प्रह्लाद दाहालले उपभोक्ताको मागअनुसार बजारमा दूध सहज रूपमा उपलब्ध हुने जानकारी दिए । “दूध आपूर्तिमा कुनै कमी नहोस् भन्ने लक्ष्यसहित तयारी गरिएको छ,” उनले भने।
नेपाल सरकारले २०७७ साल फागुनमा निर्णय गर्दै २०७८ सालदेखि साउन १५ गतेलाई ‘खीर खाने दिवस’ को रूपमा मनाउन थालेको हो। यो दिवस नेपाली मौलिक संस्कृति र कृषिसँग गहिरो रूपमा जोडिएको छ।
परम्पराअनुसार असार-साउनको हिलोमा कठोर श्रम गरेका किसानहरूले साउन १५ मा विश्राम स्वरूप खीर खाने चलन रहिआएको छ। आधुनिक विज्ञानले पनि खीरले रोग प्रतिरोधात्मक क्षमता बढाउने प्रमाणित गरेको छ, जसले यो पर्वलाई स्वास्थ्यका दृष्टिले पनि महत्वपूर्ण बनाएको छ।
डेरी एसोसिएसनले सन्देश जारी गर्दै साउन १५ मा परिवारका सदस्यहरू मिलेर खीर खाँदै किसानको उत्पादनको कदर गर्न र पारिवारिक एकता सुदृढ बनाउन आह्वान गरेको छ।
