प्युठान। गएराति काठमाण्डौ उपत्यकासहित देशका विभिन्न क्षेत्रमा हल्कादेखि मध्यम वर्षा भएको छ।
पछिल्लो १२ घण्टामा कैलाली, लमजुङ, काठमाण्डौ, झापा, ताप्लेजुङ, भोजपुर, धादिङ, स्याङ्जा, गोरखा, काभ्रेपलाञ्चोक, पाल्पा, दाङ, जाजरकोटलगायतका जिल्लामा बढी वर्षा रेकर्ड गरिएको छ। केही स्थानमा हाल पनि पानी परिरहेको छ।
मौसम पूर्वानुमान महाशाखाका अनुसार आज दिउँसो लुम्बिनी प्रदेशको तराई तथा सुदूरपश्चिम र कर्णाली प्रदेशका पहाडी भू–भागका एक–दुई स्थानमा ठूलो वर्षा हुने सम्भावना छ। यस्तै, लुम्बिनी र सुदूरपश्चिम प्रदेशसहित देशका पहाडी भू–भागका केही स्थान र तराईका थोरै भागमा पनि मध्यम वर्षा पर्ने पूर्वानुमान गरिएको छ।
