प्यूठान
प्यूठानमा आज ७ बजेदेखि भाेलि बिहान ६ बजेसम्मका लागि कर्फ्यु जारी भएको छ । प्यूठानका प्रमुख जिल्ला अधिकारी दीपकराज नेपालले स्थानीय प्रशासन ऐन, २०२८ को दफा ६ बमोजिम कर्फ्यु लागू हुने आदेश जारी गरेका हुन् ।
जारी आदेशअनुसार प्यूठान नगरपालिकाका वडा नं. १, २, ३, ४, ७ र ८ मा पर्ने मुख्य तथा भित्री सडक क्षेत्र र मल्लरानी गाउँपालिकाको वडा नं. ४ को खलंगाबजार क्षेत्रमा सभा, जुलुस, प्रदर्शन, बैठक तथा भिडभाड गर्न नपाइने व्यवस्था गरिएको छ ।
यस्तै प्यूठान नगरपालिकाको घेराबाट एरावती गाउँपालिकासम्मको सडक खण्ड, करिब ५०० मिटर वरिपरिको बजार क्षेत्र र बायाँ–प्यूठान–रोल्पा सडक खण्डअन्तर्गत पर्ने सम्पूर्ण राजमार्ग क्षेत्रमा पनि सभा, जुलुस, प्रदर्शन गर्न रोक लगाइएको छ ।
निषेधाज्ञा अवधिमा अत्यावश्यक सेवाका सवारी साधन, एम्बुलेन्स, दमकल, शववाहन, स्वास्थ्यकर्मी र सञ्चारकर्मीको आवागमन भने नियमित हुने जिल्ला प्रशासन कार्यालयले जनाएको छ ।
