काठमाडौं, फागुन १३- अमेरिकी राष्ट्रपति डोनाल्ड ट्रम्प कार्यकालको अन्तिम वर्षमा दुई दिने भारत भ्रमणमा छन्। भारतीय प्रधानमन्त्री नरेन्द्र मोदीको गृह प्रदेश गुजारातबाट भ्रमण शुरु गरेका उनी आगरा हुँदै सोमबार साँझ दिल्ली पुगेका छन्।अफगानिस्तानमा तैनाथ अमेरिकी सेनालाई भेट्न बगराम सैनिक शिविरमा पुगेका भ्रमणलाई गणना नगर्ने हो भने राष्ट्रपति ट्रम्प दक्षिण एशियाको पहिलो भ्रमणमा छन्।भारत भ्रमण गर्ने डोनाल्ड ट्रम्प अमेरिकाका सातौं राष्ट्रपति हुन्। त्यसैगरी अमेरिकी राष्ट्रपतिहरुले पटक–पटक गरेर अफगानिस्तान, पाकिस्तानको भ्रमण गरेका छन्। त्यसैगरी एक पटक बंगलादेशको भ्रमण समेत गरेका छन्।
तर सन् १९५९ मा तत्कालीन अमेरिकी राष्ट्रपति ड्वाइ डी आइजआवरले अफगानिस्तानकै एक दिने भ्रमण गरेका थिए। त्यस क्रममा उनले भारत, पाकिस्तानको पनि भ्रमण गरेका थिए।नेपालको अमेरिकासँग कुटनीतिक सम्बन्ध स्थापना भएको ७२ वर्ष भएको छ। सन् १९४८ मा नेपाल–अमेरिका कुटनीतिक सम्बन्ध स्थापना भएको हो। अमेरिका नेपालको दोस्रो कुटनीतिक मित्रराष्ट्र हो। यो अवधिमा अमेरिकीका उप राष्ट्रपति, विदेशमन्त्री र ‘फस्ट लेडी’ले नेपाल भ्रमण गरे पनि विश्वका शक्तिशाली राष्ट्रपतिले नेपाल भ्रमण गरेका छैनन्।नेपालका राष्ट्र प्रमुखले अमेरिकाको औपचारिक भ्रमण गरेको पनि तीन दशकभन्दा बढी भएको छ।
