१४ फागुन २०७६ –केही दिनदेखि चम्किएको पुँजी बजारले बुधबार पनि नयाँ किर्तिमान कायम गरेको छ। पुरानो रेकर्ड ब्रेक गर्दै सेयर बजारमा बुधबार सबा चार अर्बको कारोबार भएको छ। यो अहिलेसम्मकै उच्च कारोबार अंक हो।कारोबारमा देखिएको किर्तिमानी उत्साहसँगै नेप्से परिसूचकमा त्यस्तै उछाल देखिएको छ।बुधबार नेप्से परिसूचकले ५० अंकले बढेको छ। नेप्से परिसूचक बुधबार ५० अंकले बढेर १५९६.१३ विन्दुमा उक्लिएको छ । १८० कम्पनीको ४ अर्ब १५ करोड रुपैयाँभन्दा बढीको सेयर कारोबार भएको छ । ९९ लाख ६ हजार ९८९ कित्ता सेयर खरिदबिक्री भएका छन् । कारोबार भएका १२ वटै समूहका सूचक बढेका छन् ।
कारोबार र परिसूचक दुवैमा लगातार वृद्धि हुँदा लगानीकर्ताहरु निकै उत्साहित देखिएका छन्। लामो समय निरन्तर ओरालो लाग्दै सुस्ताएको सेयर बजारमा दुई सातादेखि हरियाली छाएको हो।खासगरी सेयर बजारले नरुचाएका अर्थमन्त्री डा. युवराज खतिवडाको ठाउँमा वामदेव गौतमलाई राष्ट्रिय सभा सदस्यमा नियुक्त गर्न नेकपाको औपचारिक निर्णयपछि बजारमा एकाएक उछाल आएको हो। खतिवडा राष्ट्रियसभामा नदोहोरिने संभावनाले लगानीकर्ता आशावादी देखिएका छन्।
