२० फागुन २०७६ काठमाडौं : विश्वकप छनोटको तयारीकै लागि भनेर दशरथ रंगशालामा दुबो रोप्ने काम शुरु भएको छ। उता सातदोबाटोस्थित एन्फा कम्पलेक्सको मैदानमा खेलको लागि भ्याइनभ्याइ छ। बिहान राष्ट्रिय टिमको प्रशिक्षणदेखि लिएर दिउँसो शहीद स्मारक बी डिभिजन लिग भइरहेको छ त्यहाँ। बिहान १० बजे सातदोबाटो पुग्दा खेलाडी र प्रशिक्षक योहान कालिन तयारीमा ब्यस्त देखिन्थे।
प्रशिक्षक कालिन नेपालले लामो समयपछि घरेलु मैदानमा खेल्न पाउँदा राम्रो खेल पस्कने तयारी रहेको बताउँछन्। तेह्रौं दक्षिण एसियाली खेलकुदका क्रममा भरिएको रंगशालामा समर्थकहरुले फुटबलप्रति देखाएको उत्साहलाई नियालेका कालिन राष्ट्रिय टिमको खेल घरेलु मैदानमा आउँदै गर्दा उत्साहित सुनिन्छन्।
