फागुन २० धानका बोरामा लुकाएको चिनी विराटनगर भन्सारमा जिम्मा लगाउँदै प्रहरी । तस्वीरः कमल रिमाल
मोरङका भारतीय सीमावर्ती क्षेत्रबाट खाद्यान्न खरीद गर्ने व्यक्तिले धानमा चिनी लुकाएर नेपाल भित्र्याउने गरेको पाइएको छ ।रतुवामाई नगरपालिका–१ सोनापुरस्थित दशगजामै जोडेर खाद्यान्न खरीद–बिक्रीको काँटा संचालन गर्दै आएका नसिम मियाले बिक्रीका लागि पठाएको धान बोकेको ट्याक्टर दुर्घटना भएपछि चिनी फेला परेको छ । मिया वडा सदस्य हुन् । मियाले कारवाही हुने डरले धान र चिनी दाबी गर्न आफू उपस्थित नभई प्रतिनिधिलाई प्रहरीको सम्पर्कमा पठाएका छन् ।
दुर्घटनापछि धान बोकेको ट्याक्टरका चालक फरार भएकाले सोमबार प्रहरीले धान हटाउने क्रममा ५० किलोका ५० बोरा चिनी फेला पारेको हो । १ सय ७ बोरा धानको बीच भागमा ५० बोरा चिनी फेला परेको छ ।धान र चिनी दुवैको बिल नभएकाले भन्सार कार्यालयमा बुझाइएको निरीक्षक रायामाझीले बताए । मोरङका भारतसँग जोडिएका नाकाहरूमा कारोबारीले खाद्यान्न खरीद बिक्री गर्ने काँटा संचालन गर्दै आएका छन् । स्थानीय किसानबाट धान खरीद गरेको भनेर व्यापारीले भारतबाट भन्सार छलेर ल्याएको धान खरीद गर्ने गरेका छन् ।खाद्यान्न लोड गरेका साधनमा भन्सार छलीका अरु वस्तु पनि मिसाएर नेपालका विभिन्न बजारमा लाने गरेका छन् ।
