२१ फागुन २०७६ काठमाडौं : प्रधानमन्त्री केपी ओलीको बुधबार गर्न लागिएको मृगौला प्रत्यारोपणको सफलताको कामना गर्दै पशुपतिनाथ मन्दिरमा बिहान विशेष पूजा गरिएको छ । पशुपति क्षेत्र विकास कोषका कोषाध्यक्ष डा. मिलनकुमार थापाले प्रधानमन्त्रीको स्वास्थ्यको कामना गर्दै रुद्राभिषेक सहितको विशेष पूजा गरेका हुन् ।
२७ हजार रुपैयाँको रुद्राभिषेक र नवग्रह जाप सहितको विशेष पूजा गरिएको हो । कोषका कोषाध्यक्ष थापाले भने, ‘देशको प्रमुख कार्यकारी प्रधानमन्त्री दोस्रोपटक मृगौला प्रत्यारोपण गर्दै हुनुहुन्छ, उहाँमा देश विकासको सपना र उत्साह दुवै छ त्यसैले देश र जनताका लागि सेवा गर्न खोज्ने प्रधानमन्त्रीको नाममा यो विशेष पूजा गरेको हुँ ।’ प्रत्यारोपणसँगै त्यसपछिको स्वास्थ्य राम्रो होस् भनी विशेष पूजा गरेको उनको भनाइ छ ।
