काठमाडौं, फागुन २१ –छिमेकी मुलुक भारतमा कोरोनाभाइरस संक्रमितको संख्या २८ पुगेको छ। त्यसमध्ये १६ जना इटालियन नागरिक रहेका छन्।सोमबारसम्म भारतमा छ जनामामात्र कोरोनाभाइरसको संक्रमण देखिएको थियो।केही समयअघि राजस्थान घुमेर फर्किएका एक जना इटालियनमा कोरोनाभाइरस देखिएको थियो। त्यतिबेला क्वारेन्टाइनमा राखिएका बाँकी १५ जनामा बुधबार कोभिड-१९ को संक्रमण देखिएको रोयटर्सले जनाएको छ।
उनीहरूलाई घुमाउने बस ड्राइभरलाई पनि कोरोनाभाइरस देखिएको स्वास्थ्य मन्त्री हर्ष वर्दनले जानकारी दिएका छन्।आग्रामा एक जनाले आफ्ना परिवारका ६ जनामा कोरोना सारेको देखिएको छ। इटालीबाट आएका ती व्यक्तिका परिवारका ६ जनामा पनि कोरोना देखिएको टाइम्स अफ इन्डियाले जनाएको छ।
