२३ फागुन- नेपाल चलचित्र निर्माता संघले सम्पूर्ण फिल्मको छायांकन कार्य रोक्न माग गरेको छ । विश्वभरका मानिसमा त्रासको रूपमा देखिएको कोरोना भाइरस (कोभिड १९) को जोखिम बढ्दै गएकाले संघले सम्पूर्ण चलचित्रकर्मीलाई सम्भव भएसम्म छायांकन स्थगित गर्न अनुरोध गरेको हो ।संघका महासचिव रोज राणाले एक विज्ञप्ति जारी गर्दै यस्तो सूचना जारी गरेका हुन् ।
सरकारले कोरोना भाइरसको संक्रमणबाट बच्न पारिवारिक जमघट, मेला महोत्सव, जात्रा, पर्वजस्ता कार्यक्रममा सरिक नहुन र त्यस्ता कार्यक्रम स्थगन गर्न समेत अनुरोध गरेसँगै संघले पनि फिल्मकर्मीका लागि यस्तो सूचना समेत जारी गरेको हो ।सबै चलचित्रकर्मीहरू देश र जनताप्रति उत्तरदायी हुनपर्ने धारणा राख्दै सम्पूर्ण चलचित्रकर्मीलाई प्रत्यक्ष र परोक्षरूपमा भाइरस सर्ने जोखिमबाट बच्न संघले आग्रह गरेको छ ।
