फागुन २८ काठमाडौं । पूर्वसञ्चारमन्त्री गोकुल बाँस्कोटाले बनाउँदै गरेको घरमा रिमोट बम विस्फोट भएको पाइएको छ ।भक्तपुरको लोकन्थलीमा निर्माणाधीन घरको गेटमा बुधबार बिहान बम विस्फोट भएको हो ।प्रहरीले घटनास्थलबाट प्रेसर कुकरको सिट्ठी र ५० मिटर पर रिमोट फेला पारेको छ ।एक उच्च प्रहरी अधिकारीले भने,“घटनास्थलमा बरामद सामग्री र प्रकृति हेर्दा रिमोट बम हुनसक्ने प्रारम्भीक अनुसन्धानबाट खुलेको छ । विस्फोट गराउने व्यक्ति वा समूहले घरभन्दा केही टाढा रहेर रिमोटबाट विस्फोट गराएकोजस्तो देखिन्छ ।”
विस्फोटबाट बाँस्कोटाको घरको ३ मिटर पर्खालमा क्षति पुगेको छ ।बाँस्कोटासँगै छिमेकी कपिल घिमिरेको साढे ४ तलाको घरको ४ वटा झ्यालको सिसा फुटेको छ । घिमिरेकै घरमा भाडामा बस्दै आएका सुरेन्द्र खड्गीको बा ११ च ४७८१ नम्बरको मारुती भ्यानको सिसा पनि फुटेको छ । बाँस्कोटा भने अहिले पनि प्रधानमन्त्री केपी शर्मा ओलीको बालकोटस्थित घरमा बस्दै आएका छन् । बाँस्कोटा भने अहिलेसम्म घटनास्थलमा पुगेका छैनन् ।
