फागुन २९, २०७६ पर्वत : मध्यपहाडी लोकमार्ग अन्तर्गत साविकको पोखरा बागलुङ सडकखण्ड चैत १ गतेबाट दैनिक तीन घण्टा बन्द गरिने भएको छ। सडक बिस्तार र स्तरोन्नतिको लागि केही ठाउँमा विस्फोटक पदार्थको प्रयोग गर्नुपर्ने भएका कारण सदरमुकाम कुस्माको खरेहादेखि चुवाको चाइनाचोकसम्म दैनिक तीन घण्टा घण्टा बन्द गर्ने निर्णय भएको हो। जिल्ला प्रशासन कार्यालयमा भएको बैठकले मध्यान्ह १२ बजेदेखि अपराह्न ३ बजेसम्म सडक बन्द गर्ने निर्णय गरेको छ।  सडक बिस्तारका लागि भीर फोर्नुपर्ने भएको र विस्फोट बाहेकको विकल्प नरहेको कारण सडक अवरुद्ध गर्नैपर्ने भएको हो।  मध्यपहाडी लोकमार्ग आयोजनाले ७२ किलोमिटर लामो पोखरा बागलुङ खण्ड लाई नयाँ स्वरूपमा ढाल्ने गरी मर्मत सम्भार तीव्र पारिरहेको छ। लोकमार्ग पुरै नयाँ स्वरूपमा बिस्तार र स्तरोन्नति गर्न चार वटा प्याकेज बनाएर काम भइरहेको छ।