चैत २- काठमाडौं । प्रधानमन्त्री केपी शर्मा ओलीको दुई हप्ता अघि दोस्रोपटक मिर्गाैला प्रत्यारोपण गरिएको छ । १२ वर्ष अघि भारतको एपोलो अस्पतालमा प्रत्यारोपण गरेको मिर्गाैलाले काम गर्न छाडेपछि गत फागुन २१ गते दोस्रोपटक त्रिवि शिक्षण अस्पताल महाराजगञ्जमा प्रधानमन्त्री ओलीले दोस्रोपटक मिर्गाैला प्रत्यारोपण गरेका हुन् । उनलाई अहिले आरामको खाँचो छ ।गत मंसिरमा एपेन्डिसाइटिसको शल्यक्रिया गरेका प्रधानमन्त्री ओलीको त्यसबेला शरीरमा संक्रमण भएको थियो । उपचारपछि संक्रमण निको भएसँगै फागुन २१ गते मिर्गाैला प्रत्यारोपण गरेका प्रधानमन्त्री ओलीले यसअघि डायलासिस गर्दै आएका थिए ।यसरी नियमित उपचार र औषधि सेवन गर्दै आएका प्रधानमन्त्री ओलीको शरीर कमजोर अवस्थामा छ ।
तर, उनको आत्मबल बलियो छ भन्दैमा शारीरिक अवस्था नहेरी हिँडडुल गराउनु अनुचित रहेको चिकित्सकहरु बताउँछन् । केही हुनुअघि केही नहोस् भनेर सावधानी अपनाउनु पर्छ । तर, प्रधानमन्त्री ओलीलाई केही नै नभएको जस्तो गरेर हिँडाउनेदेखि भेटघाट गराउने कार्य हितकर मान्न सकिँदैन । अंग प्रत्यारोपण गरेपछि रोग प्रतिरोधात्मक क्षमता कम हुन्छ । तर, प्रधानमन्त्री ओली भेटघाटमा व्यस्त रहन थालेका छन् ।गत शुक्रबार (फागुन ३०) गते प्रधानमन्त्री ओली अस्पतालबाट डिस्चार्ज भए । अस्पताल भर्ना भएको १२औं र मिर्गाैला प्रत्यारोप गरेको १०औं दिनमा डिस्चार्ज हुँदा सामान्य कुरामा पनि ध्यान दिएको देखिएन ।
सायद प्रधानमन्त्री ओली तन्दुरुस्त रहेको देखाउने कसैको इच्छा हावी भयो होला, तर स्वास्थ्यमाथि खेलवाड गर्नु उचित हुँदैनथ्यो । प्रधानमन्त्री ओलीलाई गाडीमा चढाउन ल्याउँदा हिँडाएर ल्याउनु गलत थियो । अस्पतालभित्रबाट गाडीमा चढ्न आउँदा प्रधानमन्त्री ओली हिँड्न नसकेर झन्डै लडेका थिए । सँगै रहेका अरुले समाएकाले उनी लड्न पाएनन्। तर, लडेको भए प्रधानमन्त्रीको अवस्था के हुन्थ्यो ?प्रधानमन्त्री ओली बिरामी रहेको दुनियाँलाई थाहा छ । उनको स्वास्थ्य लाभको कामना गर्दै आरामको खाँचो रहेको सबैले भनेका छन् । तर, प्रधानमन्त्री ओलीको स्वास्थ्यप्रति सचेत नहुँदै हिँडाउनेदेखि भेटघाट गराउने कार्यमा कसको कुन किसिमको स्वार्थ छ या अन्जान हो । यसबारे प्रधानमन्त्री ओली तथा पारिवारिक सदस्य र उनको सचिवालय सदस्यहरु पनि सजग रहनुपर्छ ।
