२०७६ चैत २ – नेपालको पहिलो कमेडी रियालिटी शो ‘कमेडी च्याम्पियन’को फाइनल शनिबार आयोजना गरियो । यो शोको विजेता बनेका छन्, हिमेश पन्त । फाइनलमा पुगेका सुमन कोइराला र खड्ग बहादुर पुन मगरलाई पछि पार्दै हिमेश विजेता बनेका हुन् ।शनिबारको साँझ च्यासलमा रहेको च्याम्पियनको हल भरिदै थियो । आएका दर्शक फरक–फरक प्रतियोगीलाई समर्थन गर्दै सेटमा उपस्थित थिए । सबैमा एउटै चासो थियो, ‘आखिर को बन्छ त कमेडी च्याम्पियन ?’‘कमेडी च्याम्पियन’की संचालिका रीमा विश्वकर्माले बेला–बेला सोधिरहन्थिन्, ‘को बन्ला त कमेडी च्याम्पियन ?’ दर्शकहरुले आफ्नो मनपर्ने प्रतियोगीको नाम लिइरहेका थिए । कार्यक्रमको सुरुवातमा बाहिरिएका केही प्रतियोगीहरुले प्रस्तुपत दिए । टप ३ को पालो अन्तिममा नै थियो ।घडीको सुई बेलुकाको ८ नजिक पुगिसकेको थियो । बल्ल बेला भयो, पहिलो कमेडी च्याम्पियनको नाम सार्वजनिक गर्ने ।
होस्ट रीमाले निर्माता केकी अधिकारीलाई विजेताको नाम लिएर स्टेज आउन आग्रह गरिन । विजेताको घोषणा गर्ने जिम्मा मह जोडीले पाए । हरिवंशले विजेताको नाम खोले र बोले, ‘बधाई छ सुमन, बधाई छ खबपु र अझै बधाई छ हिमेशलाई । हिमेश बन्नुभयो पहिलो कमेडी च्याम्पियन ।’नाम घोषणा गर्नुपूर्व सुमन, हिमेश र खबपु एक–अर्काको मुटुको चाल नापिरहेका थिए । उनीहरुको उत्साह हेर्नलायक थियो । विजेता घोषणा भइसकेपछि पनि उनीहरु निराश देखिएनन् । हिमेशलाई अंकमाल गरे, बधाई दिए । हिमेशको खुसी उनको मुहारमा प्रष्ट देखिन्थ्यो ।सेट भित्रको रौनक सकियो । दर्शकहरु फटाफट बाहिर निस्किदै थिए । बाहिर भने विरोधको आवाज सुनियो ।खड्ग बहादुरका समर्थकहरु कमेडी च्याम्पियन–मुर्दावाद भन्दै नारा लगाइरहेका थिए । उनीहरुले भोटमा पारदर्शिता नभएको आरोप लगाएका थिए । एक महिला आक्रोशित मुद्रामा भनिन्–‘हामीलाई १२ बजेसम्म भोट गर्न पाउने भनिएको थियो । तर, यहाँ ४ बजेसम्म भोट खुल्ला गरिएछ । यो सरासर धाधली भयो ।’
केही विरोधकर्ताहरुले खबपुले कती भोट पाए, हेर्न पाउनुपर्ने माग राखिरहेका थिए । ‘कमेडी च्याम्पियन’का निर्देशक विशाल भण्डारी अलमलमा थिए । गएर उनीहरुलाई जवाफ दिने वा चुप बस्ने उनी दोधारमा थिए । जज मनोज गजुरेलले विशाललाई रोके र बाहिर निस्किए । गजुरेलले त्यहाँको भिडबाट खबपुको नेतृत्व गर्ने एक व्यक्तिलाई विशालसम्म ल्याए ।त्यहाँ विशालसँग ती व्यक्तिले रिस पोख्दै थिए, ‘लुटको खेती नगर्नुस् न । कसको कती भोट आयो भन्ने अरु रियालिटी शोमा देखाइएको हुन्छ । यहाँ त तपाईहरुले नदेखाई बन्द गरिदिनुभयो ।
