चैत ४, २०७६ बुटवल-प्रदेश सरकारले गौरव र नेपालकै नमूना आयोजनाका रुपमा प्रस्तुत गर्नेगरी लुम्बिनी प्रादेशिक अस्पतालको गुरुयोजना तयार पारेको छ। साविकको लुम्बिनी अञ्चल अस्पताल प्रदेश मातहत आएपछि यसलाई नमूना र स्तरीय अस्पतालका रुपमा विकास गर्न गुरुयोजना तयार पारिएको हो।प्रदेश सरकारले करिब १४ अर्ब लागतमा अत्यधुनिक अस्पतालको भवन निर्माणको गुरुयोजना तयार पारेको छ। यो गुरुयोजनाको डिजाइन हेर्दा यसले प्रदेश ५ मात्रै होइन, नेपालकै विकास आयोजनामा नयाँ सन्देश दिनेछ।
मुख्यमन्त्री शंकर पोखरेलले बुटवलमा रहेको लुम्बिनी प्रादेशिक अस्पताल प्रदेशको गौरव र नेपालकै मोडलका रुपमा प्रस्तुत गर्नेगरी निर्माण गर्ने सोँचमा रहेको जानकारी दिए। उनका अनुसार परम्परागत निर्माणको शैली परिवर्तन गरी ठूला संरचना निर्माणतर्फ निजी क्षेत्रले समेत साथ दिने बेला आएको छ। प्रदेश मातहतमा आएपछि माघमा अस्पतालको वरिपरि रहेका ७४ वटा सटरबाट व्यवसायीलाई हटाएको थियो।गुरुयोजनाअनुसार भूमिगत २ तलासहित दशौं तलाको अस्पतालको मुख्य भवन बन्नेछ। जसमा सय शैय्या हुनेछन् भने प्रसुती तथा बाल वार्ड, क्यान्सर वार्ड गरी ५ सय शैय्याको गरी १२ सय शैय्याको मुख्य भवनको गुरुयोजनामा प्रस्ताव गरिएको छ।
मुख्य भवनको अण्डरग्राउण्डमा १ सय ५८ वटा कार, जिप र १ सय २२ वटा मोटरसाइकल राख्न मिल्नेगरी पार्किङ बनाइनेछ। क्यान्सरका बिरामीलाई उपचार गर्दा रेडिएसन बाहिर नजाने गरी बंकरको समेत डिजाइन गरिएको इञ्जिनियर विष्णु पन्थीले बताए। प्रदेश सरकारले गुरुयोजना निर्माणको जिम्मेवारी प्रादेशिक योजना आयोगलाई दिएको थियो। इञ्जिनियर पन्थीले गुरुयोजना अनुसार नेपालकै एउटा नमूना अस्पताल बनाउनेगरी डिजाइन भएको छ। अस्पतालभित्र सुन्दर बगैँचा र सडकबाट अत्यधुनिकरुपमा निर्माण गरिने पर्खालसहितको आर्कषक भवनले बुटवलकै सुन्दरता थप्नेछ।
