चैत १२,२०७६ प्युठान यतिबेला नोवेल कोरोना (कोभिड–१९) को सङ्क्रमणले विश्व महामारीको रुप लिएको छ। सङ्क्रमणलाई मध्यनजर गर्दै जिल्लाका स्थानीय तहले क्वारेन्टाइन कक्ष बनाउन थालेका छन् । सङ्क्रमणको पूर्व तयारी गर्दै स्थानीय तहले क्वारेन्टाइन कक्ष निर्माण गर्न लागेका हुन् ।
प्यूठान नगरपालिकाले १२ वटा वेडको क्वारेन्टाइन कक्ष निर्माण गरेको छ ।प्यूठान नगरपालिकाले विजुवारस्थित कालिका विकास केन्द्र नेपालको सभाहलमा १२ बेडको क्वारेन्टाइन तयार पारेको छ । यो सँगै नगरपालिकाले वडा नम्बर ४ स्थित खेलकुद मैदान पारीपट्टी बाझोबारीमा २५ बेड र पूण्यखोलास्थित खेलकुद कवर्ड हलमा १० बेड क्षमताको अरु क्वारेन्टाइन निर्माण प्रक्रिया अघि बढाएको छ ।
माण्डवी गाउँपालिका –३ स्थित भवानेश्वरी आधारभुत विद्यालयमा १० वेडको क्वारेन्टाइन कक्ष निर्माण गरिएको छ । गाउँपालिका अध्यक्ष श्रीधर रोकाले विपदको पुर्व तयारी अन्र्तगत कक्ष निर्माण गरिएको जानकारी दिनुभयो ।
त्यसैगरी झिमरुक गाउँपालिकाले बाल शिक्षा माविमा पाँच वेडको क्वारेन्टाइन कक्ष निर्माण गरेको छ ।
जिल्ला प्रहरी कार्यालय प्यूठानले महिला तथा बालबालिका सेवा केन्द्रको भवनमा सात वेडको क्वारेन्टाइन कक्ष निर्माण गरेको जनाएको छ ।
मल्लरानी गाउँपालिकाले गाउँपालिका स्थित वडा नं. ४ खलंगामा साविक महिला तथा बालालिका कार्यालय प्यूठानको भवनमा १० जना व्यक्ति राख्न सक्ने क्वारेन्टाइनको तयार गरेको छ ।
जिल्लामा स्थानीय तहले विदेशबाट आएका व्यक्तिको तथ्याङ्क सङ्कलन गर्ने र उनीहरुलाई घरमै बस्न आग्रहसमेत गरेका छन् । लक डाउनको पूर्ण रुपमा पालना गर्न जिल्ला प्रशासन कार्यालय प्यूठानले अनुरोध समेत गरेको छ । खाद्यान्न, औषधी उपचार लगायत अत्यावश्यक काम बाहेक बाहिर ननिस्कन प्रशासनले अनुरोध गरेको छ ।
