राम प्रघट कोरी विजयनगर, बैशाख ६ कपिलवस्तुको विजयनगर गाउँपालिकामा धार्मिक स्थलमा ५ जना भन्दा बढीले पूजा अराधना गर्न नपाईने निर्णय गरेको छ । गाउँपालिका भित्र रहेको मन्दिर, मस्जिद र चर्चमा ५ जनाले मात्र पूजापाठ, नमाज पढ्न पाउने गाउँपालिका अध्यक्ष गोपाल बहादुर थापाले बताउनु भएको छ । सोही ५ जनाले निरन्तर प्रत्येक दिन पूजा प्राथना गर्न पाउने उहाँले बताउनु भयो ।
उक्त धार्मिक स्थलहरुमा पाँच जना भन्दा बढीले प्रबेश गरेमा धर्म गुरु अगुवाई गर्ने व्यक्तिलाई नियमानुसार कारवाही गर्ने थापाले बताउनुभयो । अहिले विश्वभरी महामारीको रुपमा फैलिएको कोरोना भाइरस (कोभिड–१९)को संक्रमणको जोखिम बढ्दै गएकोले सामाजिक दुरी कायम राख्नका लागि यस्तो निर्णय गरेको बताउनुभयो ।उहाँले सरकारले लगाएको लकडाउनको पालना गर्नुको साथै कोरोना महामारीलाई नियन्त्रण गर्न सामाजिक दुरी कायम गर्न सबै आग्रहसमेत गर्नुभयो ।
