काठमाडौं ः साग फुटबलमा परिबर्तन विमलसहित तीनको स्थानमा वैकल्पिक खेलाडी टोलीमा /
अखिल नेपाल फुटबल संघ (एन्फा) ले विश्वकप छनोट अन्तर्गत दोस्रो चरणको पाँचौ खेलमा कुवेतविरुद्ध खेलअघि टोलीबाट बर्खास्त गरेका तीन खेलाडीले दक्षिण एसियाली खेलकुद (साग) पनि गुमाउने पक्काजस्तो देखिएको छ । एन्फाले अनुशासन उल्लङ्घन गरेका कारण फरवार्ड विमल घर्तीमगर, मिडफिल्डर अन्जन विष्ट र सन्तोष तामाङ तथा डिफेन्डर दीनेश राजवंशीलाई टोलीबाट निष्कासन नै गरेको थियो । सन्तोषबाहेक तीन खेलाडी सागको टोलीमा समावेश रहेकाले उनीहरुको सागमा सहभागिताबारे एन्फाले निर्णय गरेको थिएन । तर अब यी तीनै खेलाडीले सागमा सहभागिता नजनाउने देखिएको छ ।
एन्फा स्रोतका अनुसार यी तीन खेलाडीको स्थानमा वैकल्पिकबाट अन्य तीन खेलाडीलाई समावेश गरिएको छ । नेपाल यू-२३ टोलीमा सहभागी भइसकेका फरवार्ड प्रेजेन तामाङ, राजीव लोप्चन र राजेश परियारलाई टोलीमा समेटिएको छ । तीनै खेलाडीले एन्फा एकडेमी हुँदै नेपालका लागि हरेक उमेर समूहमा खेलेका छन् ।
भुटानमा भएको कुवेतविरुद्ध खेलका लागि बर्खास्त भएपछि तीनै खेलाडीले सागको प्रशिक्षणमा सहभागी भएका छैनन् । दिनेशले च्यासलका लागि चन्द्रागिरी गोल्डकप अन्तर्गत शनिबार पुलिसविरुद्ध खेल खेलिसकेका छन् । उक्त गोल्डकप एन्फाअन्तर्गत प्रतियोगिता नभएकाले प्रतिबन्ध नलागेको बुझिएको छ ।
एन्फाले खेलाडीहरुलाई के कस्तो कारवाही हुने अनुशासन समितिको निर्णयपछि मात्र यकिन भन्न सकिने बताउँदै आएको छ । वैकल्पिक खेलाडीलाई प्रशिक्षणमा सामेल गराउनु र अन्य प्रतियोगितामा खेल्नुले पनि अब तीन खेलाडीको सागमा खेल्ने सम्भावना सकिएको बुझ्न सकिन्छ ।
