काठमाडौं : बार्सिलोनाका कप्तान ( अर्जेन्टिनी फरवार्ड ) लिओनेल मेस्सी सन् २०१९ को ब्यालोन डी’ओर उपाधि जित्दै विश्व प्रतिष्ठित यस अवार्ड छैटौं पटक जित्दै कीर्तिमान कायम गर्ने लक्ष्यमा छन् । बार्सिलोनाका कप्तान समेत रहेका उनले सन् २०१५ यता यस उपाधि जित्न सकेका छैनन् ।
मेस्सीले सन् २०१९ मा बार्सिलोनाका लागि ३९ गोल र १४ असिस्ट प्रदान गरेका छन् । उनले गत सिजन बार्सिलोनालाई स्पेनिस लिगको उपाधि जिताउन निर्णायक भूमिका खेलेका थिए । यसबाहेक बार्सिलोनाले च्याम्पियन्स लिगको सेमिफाइनल र कोपा डेल रेको फाइनल पनि खेलेको थियो । जारी सिजन पनि बार्सिलोना लिग तालिकाको शीर्ष स्थानमा रहेको छ । च्याम्पियन्स लिगको समूहमा पनि बार्सिलोना शीर्षस्थानमा रहेको छ ।
डिसेम्बर २ तारिखमा फ्रान्सको राजधानी पेरिसमा हुने समारोहमा मेस्सी उपाधिका दावेदारमध्यका एक हुन् । मेस्सीसँगै युभेन्टसबाट खेल्दै आएका पोर्चुगिज फरवार्ड क्रिस्टियानो रोनाल्डोले पनि ५ पटक यस अवार्ड जितेका छन् । यसपटक मेस्सीसँगै रोनाल्डो पनि उपाधिको दावेदारका रुपमा रहेका छन् । यसबाहेक लिभरपुलका डिफेन्डर भर्जील भान डाइकलाई पनि उपाधिको दावेदारको रुपमा हेरिएको छ ।
उनले उक्त अवार्डबारे बोल्दै ओट्रोलाई भने, ‘ ब्यालोन डी’ओर निकै महत्त्वपूर्ण उपाधि हो । विश्व फुटबलकै यस अवार्ड जित्न पाउनु मेरो लागि विशेष रहयो । हालसम्म पहिलो अवार्ड मैले निकै महत्त्वका साथ् हेरेको छु । यो सब म एक्लै मात्र नभएर मेरा समकक्षीको साथ र सहयोगले सम्भव भएको हो । व्यक्तिगत उपाधि भएपनि सबै टोलीका साथीहरु यसका अभिन्न पाटो हुन् ।’
अर्जेन्टिनाका लागि कप्तानी गर्दै आएका मेस्सीले ५ गोल गर्दै २ असिस्ट प्रदान गरेका छन् । अर्जेन्टिनाले यसै वर्ष सम्पन्न कोपा अमेरिकामा तेस्रो स्थान हासिल गरेको थियो । अन्तर्राष्ट्रिय खेलमा अपेक्षित प्रदर्शन गर्नबाट चुकेका उनले अझैपनि उपाधि खडेरी तोड्न सकेका छैनन् । यसले भने उनको दावेदारी केहि कमजोर हुन सक्नेछ ।
