प्यूठान, असार २७ । प्यूठानका पहिलो संक्रमित कोरोना निको भएर घर फर्किएका छन् । आज शनिबारमात्र स्वर्गद्वारी नगरपालिका वडा नम्बर ४ जिमुरपाटाको आइसोलेसनमा रहेका १९ संक्रमितलाई कोरोना जितेको हुनाले बधाई दिदै नगरपालिकाका नगरप्रमुख नेत्र बहादुर रोका क्षेत्री , स्वास्थ्य संयोजक दल बहादुर केसी लगाएतका सरोकारवालाहरूद्वारा अबिर लगाई दोसल्ला ओडाएर सम्मानसहित बधाई दिदै घरमा पठाईएको छ । यो सङ्गै नगरपालिकामा कोरोना जित्नेको संख्या २६ पुगेको छ ।जेष्ठ २० गते संक्रमण देखिएका प्यूठानका पहिलो कोरोना संक्रमित स्वर्गद्वारी नगरपालिका वडा नम्बर ४ का ५९ वर्षीय पुरूषपनि ३६ दिनको आईसोलेसन बसाईपछी कोरोना जितेर घरमा गएका छन । उनको फ्लोअपको रिपोर्ट यस अघि पुन पोजेटीभ आएको थियो । जम्मा ४२ जना संक्रमितमध्य आज थप कोरोना जित्नेहरूमा वडा नम्बरको ४ का ६ जना , वडा नम्बर ५ को १जना , वडा नम्बर ६ को १जना , वडा नम्बर ७को १ जना , वडा नम्बर ८का ९ जना पुरूष र वडा नम्बर २ को १ जना महिला रहेका छन । उनीहरूको फ्लोअपको रिपोर्ट आईनसकेता पनि WHO को मान्यता तथा नेपाल स्वास्थ्य विभागको निर्देशन अनुरूप संक्रमण भएको १५ दिनभन्दा बढी समय हुदा पनि कुनै पनि लक्षण नदेखिएको र स्वास्थ्य अवस्था एकदम ठिक रहेको सामान्य अवस्था अनुसार कोरोना जितेको एकिन गरि घरमा पठाईएको नगरपालिकाका स्वास्थ्य संयोजक दल बहादुर केसीले बताएका छन ।अब नगरपालिकामा १६ जना संक्रमित बाकी छन । जसमध्ये १३ जना संक्रमितलाई भोलि आईतवार बिदाई गरिने नगरपालिकाको स्वास्थ्य शाखाले जानकारी दिएको छ । शनिबार नगरपालिकामा १६ जना को रिपोर्ट पनि आएको छ । कन्ट्रयाक ट्रेसिङ प्रक्रिया तथा आरडिटी पोजेटीभ देखिएका नागरिकको पिसिआर परिक्षणमा सोर्है जनाको रिपोर्ट नगेटीभ रहेको संयोजक केसीले बताउनु भयो ।