प्यूठान, साउन २२ । सरुमारानी गाउँपालिकाले सञ्चालन गरेको छोरी पेवा वचत कार्यक्रमबाट १३३ छोरी लाभान्वित भएका छन् ।
छोरा–छोरीबीच हुने विभेद तथा बालविवाह कम गर्न सुरु गरेको उक्त कार्यक्रमबाट हालसम्म १३३ छोरीहरु लाभान्वित भएको पालिका स्रोतले जनाएको छ ।
गाउँपालिकाले जनाए अनुसार छोरीमाथि हुने हिंसा न्यूनीकरण गर्न तथा छोरीप्रति सम्मान बढाउनका उक्त कार्यक्रम सञ्चालनमा ल्याइएको हो ।
पालिकाले उक्त कार्यक्रम अन्तर्गत छोरी जन्मनेबित्तिकै उनको नाममा रकम जम्मा गर्ने गरेको छ । उक्त कार्यक्रम सञ्चालन गरेपछि छोरा–छोरीबीच विभेद कम हुँदै गएको गाउँपालिका अध्यक्ष झग बहादुर विश्वकर्माले जानकारी दिए ।
पालिकाले यस कार्यक्रम मार्फत छोरीमाथि हुने लैंगिक हिंसा न्यूनीकरण, छोरा र छोरीमा हुने विभेद हटाउन तथा समाजमा छोरीलाई सकारात्मक रुपमा हेर्ने वातावरण सिर्जना हुने विश्वास अध्यक्ष विश्वकर्माको भनाई छ । गाउँपालिकाले पालिका भित्र जन्मिने हरेक छोरीको नाममा सहकारीमा खाता खोलिदिने गरेको छ । उनले भने –“हाल छोरीको नाममा मासिक २०० रुपैयाँ जम्मा गरिदिने गरेका छौँ र यो रकम विस्तारै वढाउदै जानेछौँ” ।
गाउँपालिकाले ऐरावती बहुउद्देश्यीय साना किसान सहकारी संस्था बड्डाँडा र साना किसान कृषि सहकारी सस्था बांगेसाल गरी दुईओटा सहकारीमा छोरीको नाममा रकम जम्मा गर्ने व्यवस्था मिलाएको छ । गाउँपालिकाले २० वर्षीय कार्यविधि तयार गरी १० वर्षसम्म रकम जम्मा गरिदिने छ ।
अघिल्लो आर्थिक वर्षदेखि सञ्चालन गरेको छोरी पेवा बचत कार्यक्रम हाल प्रभावकारी बन्दै गएको छ । यसरी पालिकाले छोरीका नाममा खोलिएको बचत खाताबाट भविष्यमा उनीहरुमाथि आइपर्ने आर्थिक समस्या समाधान गर्न सहयोग पुग्नेछ ।
