काठमाडौँ, साउन २५ । कोरोना भाइरसको महामारीविरुद्ध सरकारी अभियान प्रभावकारी हुनुपर्ने माग राखेर बसेका ‘इनफ इज इनफ’ अभियानका अगुवाले अनशन तोडेका छन् ।
सरकारले कोरोना भाइरसको संक्रमण रहे–नरहको थाहा पाउनका लागि गरिने परीक्षणको दायरा फराकिले बनाएको तथा संक्रमण नियन्त्रणका लागि पहल प्रभावकारी बन्न थालेको निष्कर्षसहित ईशान अधिकारी ‘ई’ ले आइतबार बिहान २३ औँ दिनमा अनशन तोडेका हुन् ।
स्वास्थ्य मन्त्रालयका सहप्रवक्ता समीर अधिकारीले उनलाई पानी खुवाएर अनशन तोडाएका हुन् ।
आरडीटी प्रयोग स्थगित गर्ने, पीसीआर विधिमात्र प्रयोग गर्ने, विदेशबाट नेपाल फर्किरहेका व्यक्ति, कोभिड–१९ सङ्क्रमण पुष्टि भएका व्यक्तिको सम्पर्कमा आएका, जोखिममा भएका स्वास्थ्यकर्मी, स्वासप्रश्वाससम्बन्धी रोगको लक्षण देखा परेका, ज्वरो आएका र स्वाद लिने वा गन्ध सुँघ्ने शक्ति हराएको जस्ता कोभिड–१९ का कुनै पनि लक्षण देखा परेका र पीसीआर परीक्षण गराइनुपर्ने चिकित्सकीय सुझाव पाएका सबैको पीसीआर परीक्षण गर्ने सम्झौता भएको थियो ।
सम्झौता पूरा नभएपछि साउन ३ गतेबाट ईः र करण गुरुङले पुनः वसन्तपुरमा अनशन सुरु गरेका थिए।
