काठमाडौं, साउन २७ । चीनको वुहानमा सबैभन्दा पहिले मानिसमा देखिएको कोरोनाभाइरस (कोभिड १९) अहिले विश्वभर मानिसहरुका लागि सबैभन्दा ठूलो चुनौति भएको छ ।
अनि यसको भ्याक्सिन बनाउन अहिले विश्वमा एक दर्जनभन्दा बढी देशहरु लागिपरेका छन् ।
यहीबीच रुसले आफूले कोरोनाभाइरस भ्याक्सिन बनाइसकेको दाबी गरेको छ । रुसी राष्ट्रपति भ्लादिमिर पुटिनले रुसले कोरोनाभाइरस भ्याक्सिन बनाइसकेको दाबी गरेका हुन् । अनि उनले यो भ्याक्सिन सबैका लागि उपयुक्त हुने पनि बताएका छन् ।
आज अर्थात् मंगलबार कोरोनाभाइरस भ्याक्सिनको पहिलो परीक्षण भएको पनि उनले जानकारी दिएका छन् । यसका लागि दुई महिनादेखि रुसी वैज्ञानिकहरु परीक्षणमा लागिरहेको उनले बताएका छन् ।
तर, रुसको यो भ्याक्सिनमाथि पश्चिमा देशहरुले चाहिँ आशंका व्यक्त गरेका छन् ।
चीनको सिनोब्याक बायोटेक लिमिटेडले मंगलबा कोभिड १९ भ्याक्सिन मानिसमा परीक्षणका लागि अन्तिम तयारी सुरुवात गरेको जानकारी दिएको थियो ।
यो भ्याक्सिन इन्डोनेसियामा १ हजार ६ सय २० जना कोरोनाभाइरस संक्रमितमाथि पनि गरिँदै छ ।
यसअघि बेलायतको अक्सफोर्ड विश्वविद्यालयले पनि कोरोनाभाइरस भ्याक्सिन मानिसमा प्रयोगका लागि परीक्षण सुरु गरिसकेको छ ।
