काठमाण्डौं, साउन २९ । एजेन्सी बलिउड अभिनेता सञ्जय दत्तका श्रीमती मान्यता दत्तले सञ्जय दत्त चाँडै निको हुन् भनेर प्रार्थना गरिरहेका सबैलाई धन्यवाद दिएकी छिन् । उनले बुधबार जारी गरेको आफ्नो बयानमा यस्तो वताएकी हुन् ।
मान्यताले भनिन्, ‘म सञ्जुका प्रशंसकलाई यो आग्रह गर्न चाहन्छु कि तपाईंहरु कुनै पनि अफवाह र अड्कलबाजीमा नफस्नुहोस् । म चाहन्छु कि तपाईंहरुले सधैं यसैगरी आफ्नो प्रेम, आत्मियता र समर्थन प्रदान गरिरहनुहोस् । पछिल्लो केही वर्षदेखि हाम्रो परिवारले विभिन्न समस्या झेलेको छ र मलाई पूर्ण विश्वास छ कि यो समय पनि बित्नेछ । सञ्जु र हाम्रो परिवार सधैं योद्धाको रुपमा उभिएका छन् । भगवानले एकपटक पुनः हाम्रो अगाडि चुनौती खडा गरेर हामो परीक्षा लिने निर्णय गरेको छ ।’
साथै उनले भनिन् ‘यतिबेला हामीलाई तपाईंको आशिर्वाद र प्रार्थनाको आवश्यकता छ । तपाईंको मद्दतले हामी सधैं झैं बिजेता बनेर आउनेछौं । यो मौकाको प्रयोग सकारात्मकता फैलाउनका लागि गर्नुहोस् ।’
यसअघि सञ्जय दत्तले मंगलबार इन्स्टाग्राममा सेयर गरिएको आफ्नो पोस्टमा उनी उपचारका लागि कामबाट ब्रेक लिन लागेको जानकारी दिएका थिए ।
