काठमाडौं, असोज ९ । हिन्दी, तेलगु, मलयालम, तमिल सहित १६ बढी भाषामा ४० हजार भन्दा बढी गीतमा आवाज दिएका भारतका चर्चित गायक एसपी बालासुब्रमण्यमको निधन भएको छ। कोरोना भाइरससँग जुधिरहेका बालासुब्रमण्यमको ७४ वर्षको उमेरमा निधन भएको छ।
कोरोनासँग लामो समय जुधिरहेका उनलाई चेन्नईको एक निजी अस्पतालमा भर्ना गरिएको थियो। ५ अगस्टमा उनको कोरोना पोजिटिभ आए पनि १३ सेप्टेम्बरमा उनको रिपोर्ट नेगेटिभ आएको थियो। तर पछि लाइफ सपोर्टमा राखिएसँगै उनको देहान्त भएको भारतीय सञ्चार माध्यमहरुले जनाएका छन्।
बालाले बलिउडमा सलमान खानका धेरै फिल्ममा गीतहरु गाएका छन्। करिब एक दशकसम्म उनले सलमान खानका एकसे एक गीत गाए। ‘मैने प्यार किया’को ‘दिल दीवाना’को लागि उनलाई फिल्मफेयर बेस्ट मेल प्लेब्याक सिंगरको अवार्ड दिइएको थियो। त्यस्तै हम आपके है कौनमा लता मंगेशकरसँग ‘दिदी तेरा देवर दीवाना’ गीत गाएर उनी सबैको मनमा बस्न सफल भएका थिए। गायक श्रीपथी पण्डितताराध्युल्ला बालासब्रमन्यमको जन्म सन् १९४६ जुन ४ मा भएको थियो। उनलाई एसपी बाला, एसपीबी र बालु आदि नामले पनि चिनिन्थ्यो। उनको मृत्युमा बलिउडका कलाकारहरुले श्रद्धाञ्जली व्यक्त गरिरहेका छन्।
