काठमाडौं, मंसिर १४ । अमेरिकामा छायांकन हुने भनिएको चलचित्र ‘रेड वाइन’बाट नायक पल शाह बाहिरिएका छन् । यो चलचित्रमा नायक पल शाह र नायिका साम्राज्ञी राज्यलक्ष्मी शाहको जोडी पक्का भएको थियो ।
केही दिन अगाडी अहिलेका चर्चित नायक पल शाहलाई अनुबन्धित गरिएको भएपनि हाल भने शाह बाहिरीएका छन् । उनको ठाउँमा पुष्प खड्कालाई प्रवेश दिइएको छ ।
पल शाह बाहिरिएपछि निर्माणपक्षले नायक पुष्प खड्कालाई चलचित्रमा अनुवन्धित गरिसकेको छ ।अमेरिकामा बस्ने रमेश एमके पौडेलले निर्देशन गर्ने यस फिल्ममा नेपाली अभिनेत्री साम्राज्ञी शाहसँग पुष्पले रोमान्स गर्नेछन् । श्रोतका अनुसार, पुष्पले चलचित्र साइन गरिसकेका छन् ।
नायिका साम्राज्ञी राज्यलक्ष्मी शाह र नायक पुष्प खड्काले चलचित्र ‘मारुनी’मा एकसाथ काम गरेका थिए । चलचित्रले औषत व्यापार गरेपनि पुष्प र साम्राज्ञीको जोडीलाई दर्शकले रुचाएका थिए ।
रमेश एम के पौडेलको निर्देशनमा बन्न लागेको चलचित्रको छायांकनका अधिकांश दृश्य नेपालमा हुनेछ । केही दृश्यको छायांकन अमेरिकामा पनि हुने निर्माणपक्षले बताउँदै आएको छ । चलचित्रमा सन्दिप क्षेत्रीको पनि मुख्य भूमिका रहनेछ ।
पल र साम्राज्ञीले पहिलो पटक एकसाथ काम गर्ने तयारी गरेपनि तत्कालका लागि अब यो टरेको छ ।
हास्य कलाकार सन्दिप क्षेत्रीको पनि अभिनय रहने यस फिल्मको छायांकन अमेरिकामा ८० प्रतिशत र २० प्रतिशत नेपालमा हुनेछ ।
वुझिएअनुसार, पलले चलचित्रको कथावस्तु परिवर्तन गर्न आग्रह गरेपछि निर्माणपक्षसँग असमझदारी बढेको थियो । चलचित्र महिला केन्द्रित कथामा निर्माण हुँदैछ ।
