काठमाडौं, मंसिर १५ । भन्सार छलेर चोरी निकासी गर्दै सुन ल्याएको आरोपमा प्रहरले दुईजनालाई पक्राउ गरेको छ।
पक्राउ पर्नेमा रामेछापको दोरम्बा गाउँपालिका–४ का ३२ वर्षीय गंगाबहादुर थापामगर र तेह्रथुमको छथर गाउँपालिका–४ का ३२ वर्षकै कुमार सेन्चुरी छन्।
गत शुक्रबार दिउँसो महानगरीय अपराध महाशाखाबाट खटिएको प्रहरीले सिनांमगलस्थित गोल्डेन गेटअगाडिबाट गंगाबहादुरलाई शंकास्पद अवस्थामा फेला पारी जाँच गरेको थियो। सो क्रममा उनको साथबाट ३ थान सुनका बाला र करिब १२ लाख रुपैयाँ फेला परेको थियो।
थप अनुसन्धानको क्रममा उनले राजश्व छलि गरी ल्याएको सुनका बालाहरू कोटेश्वरस्थित स्काई ज्वलेर्स सञ्चालक कुमारलाई बिक्री गर्ने गरेको भन्ने खुलेको महाशाखाका प्रवक्ता ईश्वर कार्कीले बताएका छन्।
उनीहरूलाई आवश्यक कारवाहीको लागि राजस्व अनुसन्धान विभाग हरिहरभवन ललितपुर पठाइएको महाशाखाले जनाएको छ।
