काठमाडौं,मंसिर २३। अमेरिकी राष्ट्रपतिमा निर्वाचित जो बाइडेनले रक्षामन्त्रीको जिम्मेवारी अवकाशप्राप्त जनरल लोयड अस्टिनलाई दिने भएका छन्। बाइडेनले रक्षामन्त्रीमा अवकाशप्राप्त जनरल लोयड अस्टिनलाई मनोनयन गर्न लागेको अमेरिकी मिडियाहरुले उल्लेख गरेका छन् ।
६७ वर्षीय अस्टिन रक्षा मन्त्रालय सम्हाल्ने पहिलो अफ्रिकी मूलका अमेरिकी हुनेछन्। अमेरिकी सेनाका अवकाशप्राप्त चारतारे जनरल अस्टिन विगतमा अमेरिकी सेन्ट्रल कमान्डका कमान्डर थिए ।
नेसनल सेक्युरिटी टिमका वरिष्ठ सदस्य चयन भएको २ सातापछि बाइडेनले रक्षामन्त्रीमा अस्टिनलाई चयन गरेका हुन्। अस्टिनले ओबामा प्रशासनमा अमेरिकी मध्यकमान्डको नेतृत्व गरेका थिए।
यद्यपी औपचारिक घोषणा भने आगामी क्रिसमस अघि मात्र गरिने बाइडेनका सहयोगीहरुले बताएका छन् । बाइडेनले यसअघि नै राष्ट्रिय सुरक्षा सल्लाहकार सहित स्वास्थ्य टोली र ह्वाइट हाउसका वरिष्ट सल्लाहकारहरुको टोली घोषणा गरिसकेका छन् ।
