प्यूठान, माघ २९ । प्यूठानको झिमरुक गाउँपालिकाले गाउँपालिका भित्रका जेष्ठनागरिकलाई लक्षित गर्दै ‘उपाध्यक्ष कोसेली’ कार्यक्रम शुरु गरेको छ ।
पालिका भित्र रहेका ८४ वर्षमाथिका जेष्ठनागरिकको वडा मार्फत तथ्यांक संकलन गरी कार्यक्रम सञ्चालन गरिएको पालिकाका स्वास्थ्य शाखा प्रमुख विकास के.सी.ले जानकारी गराए । जेष्ठनागरिकलाई प्रदेश सरकार मार्फत विगतका वर्षहरुमा एक आर्थिक वर्षमा तीन पटकसम्म स्वास्थ्यकर्मीहरु घरमै गएर जेष्ठ नागरिकको सामान्य स्वास्थ्य परिक्षण गर्ने,औषधी दिने,स्वास्थ्य परामर्श गर्ने काम गरिन्थ्यो । यस वर्षदेखी गाउँपालिकाले ‘उपाध्यक्ष कोसेली’ कार्यक्रम मार्फत जेष्ठनागरिकलाई कोसेली दिने कार्यक्रम सञ्चालनमा ल्याइएको स्वास्थ्य शाखा प्रमुख. केसी.ले बताए ।
कार्यक्रम मार्फत गाउँपालिका भित्रका ८४ वर्ष माथिका एक सय ५० जना जेष्ठनागरिकलाई स्वास्थ्य परिक्षण संगै कोसेली उपलब्ध गराईने उनको भनाइ छ। कार्यक्रम मार्फत एक जेष्ठनागरिकलाई हरलेस,टबेल,पाउडर,साबुन,टोपी,मोजा,झोला लगायतका सामाग्रीहरु गरी दुई हजार ५ सय रुपियाँ बराबरको सामाग्री उपलब्ध गराईने स्वास्थ्य शाखा प्रमुख के।सी।ले बताए । बुधवारबाट सुरु गरिएको यो कार्यक्रम आगामी दुई हप्तासम्म चल्नेछ । जेष्ठनागरिकहरु स्वास्थ्यसंस्था तथा पालिकासम्म आउन नसक्ने भएकाले घरमै पुगेर यो सेवा दिईने समेत उनले बताए । जेष्ठनागरिकको स्वास्थ्य जाँचका क्रममा कुनै समस्या देखीएमा स्वास्थ्य संस्थामा रहेको औषधी निशुल्क रुपमा दिने र परामर्श समेत गरिने स्वास्थ्य शाखा प्रमुख के.सी.ले बताए । कार्यक्रम सञ्चालनका लागि पालिकाले चालु आर्थिक वर्षमा तीन लाख ७५ हजार रुपियाँ बजेट विनियोजन गरेको छ ।
पालिका क्षेत्रभित्रका स्वास्थ्यकर्मी र पालिकाका कर्मचारी जनप्रतिनीधिको सल्लाहले यो कार्यक्रम उपयुक्त लागेपछि सञ्चालनमा ल्याईएको गाउँपालिका उपाध्यक्ष पवित्रा जिसीले बताइन । कार्यक्रम मार्फत पालिकाका ८ वटै वडा भित्रका ८४ वर्ष माथिका जेष्ठनागरिकलाई कोसेली उपलब्ध गराईने उनले बताइन । जेष्ठनागरिकलाई उपलब्ध गराएको कोसेली लामो समय निर्वाहका लागि नभएपनि केही टेवा पुग्ने विश्वास लिएको उनले जानकारी गराइन । कार्यक्रमको प्रभावकारीताको आधारमा आगामी वर्ष पनि समावेश गर्न सकिने उनको भनाई छ ।
