काठमाडौं,फागुन १५ । अष्ट्रेलियाद्वारा सञ्चालित र हिमालय टेलिभिजनमा प्रसारित अनलाइन गायन प्रतियोगिता ‘हल अफ फेम’ सिजन-२ सुखद् यात्रा पार गर्दै समापनको चरणमा पुगेको छ ।
विभिन्न देशका प्रतियोगिहरूले पठाएको अडियो क्लिपबाट छनौट गर्दै पहिलो चरणमा ५० जना प्रतिसपर्धीले प्रवेश पाएका थिए ।
यस प्रतियोगितामा निर्णायकहरूले पनि अष्ट्रेलिया र नेपालबाट सहभागिता जनाएका छन् । नेपालबाट वरिष्ठ गायक दीप श्रेष्ठ र गायिका रजिना रिमालले निर्णायकको भूमिका निभाउँदा अष्ट्रेलियाबाट कन्दरा ब्याण्डका गायक विवेक श्रेष्ठले यो भूमिका सम्हालेका छन् ।
अडिसन राउण्डमा छानिएका ५० जनामध्येबाट च्यालेन्ज राउण्डका लागि २७ जना छनौट भएका थिए ।
च्यालेन्ज राउण्डमा पर्न सफल २७ जनालाई जम्मा ९ वटा समूहमा विभाजन गरिएको थियो । उनीहरूले ९ वटा गीतमा एक अर्कालाई च्यालेन्ज गरेका थिए । च्यालेन्ज राउण्डको पहिलो एपिसोडमा दर्पण रिजाल, गिरिजा खतिवडा र रोनिश श्रेष्ठले दीप श्रेष्ठको ’मेरो आखामा हरदिन’ गीत गाएका थिए । त्यस्तै, विजय सुनार, सन्दीप गहतराज र सञ्जीवनी महर्जनले रजिना रिमालको ’म मर्ने बेला तिमी चाहिँ आउनु’ गीत गाउँदा नामसाङ राई, दिनेश गुरूङ र सुरेन लिम्बुले ’हङकङ पोखरा’ गीत गाएका थिए ।
पूर्वमिस नेपाल सदीक्षा श्रेष्ठको सञ्चालनमा अघि बढेको हल अफ फेम सिजन-२ मा पछिल्लो समय सुमन कार्कीको इन्ट्रीलाई पनि दर्शकहरुले औधि रुचाएको पाइएको छ ।
एमएनटीभी अष्ट्रेलियाका प्रधान सम्पादक एवं ‘हल अफ फेम’ सिजन-२ का प्रमुख कार्यकारी निर्माता चिरञ्जीवी देवकोटाले यस प्रतियोगितामा प्रथम हुनेले १ लाख रूपैँया नगद पुरस्कारसहित ५ लाख बराबरको प्याकेज प्राप्त गर्ने बताए ।
यो प्याकेजमा एउटा गीत र म्युजिक भिडियो रेकर्डिङ, फोटोसेसनसहित प्रबर्धनका कार्यक्रमहरु समेटिएको छ । त्यस्तै, यस प्रतियोगिताका तीन जना निर्णायकहरू वरिष्ठ गायक दीप श्रेष्ठ, कन्दरा ब्याण्डका गायक विवेक श्रेष्ठ र गायिका रजिना रिमालसँग अष्ट्रेलिया टुर गर्ने अवसर समेत प्रथम हुनेले पाउनेछन् ।
अन्तिम ६ जना चुनिइसकेपछि प्रतियोगितामा उपाधिका लागि टिका मगर, पूर्ण विक र विजय सुनारले अन्तिम ३ मा स्थान बनाउन सफल भएका छन् । अब उनीहरू तीन जनाले नै ’हल अफ फेम-२’को उपाधिका लागि प्रतिस्पर्धा गर्नेछन् । हल अफ फेम सिजन-२ को उपाधि विजेता थाहा पाउन भने शनिबार राति नेपाली समय अनुसार ८ बजे हिमालय टेलिभिजन वा एमएनटीभी अष्ट्रेलियाका डिजिटल प्लेटफर्महरुमा हेर्नुपर्नेछ ।
