काठमाडौं,फाल्गुन १७ । प्रदेश नम्बर १ कै पहिलो सामुदायिक रेडियो सोलु एफ.एम. १०१.२ मेगाहर्जको स्टुडियोमा आगलागी भएको छ ।एफएमको स्टुडियोमा भएको आगलागीबाट रेकर्डिङसहित भवन जलेर नष्ट भएको छ ।
सोलुखुम्बुको सोलुदूधकुण्ड नगरपालिका ६ दोर्पुबजारमा रहेको रेडियोको स्टुडियोमा गएराति साढे १२ बजे आगलागी भएको हो ।
स्टुडियोबाट सुरु भएको आगोले रेकर्डिङसहित भवनसमेत जलेर नष्ट भएको रेडियो सञ्चालक समितिका अध्यक्ष बुद्धि नारायण श्रेष्ठले जानकारी दिए ।
प्रहरीले आगलागीबाट करिब एक करोड रुपैयाँ बराबरको क्षति भएको अनुमान गरेको छ । विद्युत सर्ट भएर आगलागी भएको अनुमान गरिएको प्रहरीले प्रारम्भिक अनुसन्धानपछि जनाएको छ ।
आगो नगरपालिकाको दमकल, सशस्त्र प्रहरी, नेपाल प्रहरी, नेपाली सेना, स्थानीय बासिन्दा, रेडियोका कर्मचारीलगायतको सहयोगमा झण्डै २ घण्टापछि निभाइएको थियो ।
