सुबास बेल्बासे ४ पुस बुटबल। जन्मदिन मनाउने सबैको आ-आफ्नै शैली हुने गर्छ, कसैले केक काटेर, होटल तथा रेष्टुरेन्टमा पार्टी गरेर जन्म दिन मनाउने गर्छन भने कोही बाहिर घुम्न जाने रमाइलो गर्ने आदि आदि । तर स्याङ्जाको बिर्घा स्थायी घर भइ हाल बुटवलमा बस्दै आएका गणेश पाण्डेले भने फरक तरिकाले आफनो जन्मदिन मनाएका छन् ।मानवताको सेवा जीवनको सर्वोत्तम कार्य हो भन्ने आस्थाका साथ पाण्डेले सडकका सहयोग अपेक्षी मानवको उद्धार, संरक्षण र सम्भव भएसम्म पारिवारिक पुनर्मिलन समेत गराउदै आइरहेको मानवसेवा आश्रम बुटवलको संरक्षणमा रहेका ५० जना मानिसहरुलाई एक छाक खाना खुवाएर आफ्नो जन्मदिन मनाएका छन् । 
जन्मदिनमा अनावश्यक खर्च गर्नुभन्दा बेसाहारा बनेका बुबा आमा, दाजुभाईहरूलाई केही सहयोग गरौँ भन्ने लाग्यो र जन्म दिन मनाउने नयाँ चलनलाई परिमार्जन गर्दै सामाजिक र मानवताको सेवामा खर्च गर्ने निर्णय गरेको पाण्डेले बताए ।
पछिल्लो समय जन्मदिन, बिवाह, ब्रतवन्धको अवसरमा होटल तथा रेष्टुरेन्टमा फजुल खर्च गर्ने चलन बढेको पाहिन्छ त्यस्तो विकृति अन्त्य गर्न समेत उनले गरेको काम उदाहरणीय बनेको छ । पाण्डेले खाना खर्च बापतको रु ७ हजार ५ सय रुपैयाँ मानवसेवा आश्रमलाई हस्तान्तरण गरेका छन् ।
मानवसेवा आश्रम ५ नम्बर प्रदेश संयोजक शुशिला केसीले जन्मदिनको अवसरमा सहयोग गरेकोमा धन्यवाद व्यक्त गर्दै सबैले आफ्नो जन्मदिनमा अन्यथा खर्च गर्नुभन्दा यस्तै सामाजिक र रचनात्मक कामगरि दिए यसले समाजमा धेरै राम्रो सन्देश जाने बताईन । हाल यस आश्रमको संरक्षणमा ११० जना बेसाहारा मानिसहरु बस्दै आएका छन् ।
