काठमाडौं, वैशाख १७ । दैलेखमा कोरोना भाइरस (कोभिड–१९) को संक्रमणबाट गर्भवतीको मृत्यु भएको छ ।
नारायण नगरपालिका–६ की २७ वर्षीया गर्भवतीको मृत्यु भएको स्वास्थ्य सेवा कार्यालय दैलेखका निमित्त स्वास्थ्य सेवा व्यवस्थापक थीरप्रसाद रेग्मीले जानकारी दिए ।
शुक्रबार बिहान साढे ११ बजे अस्पताल पुर्याइएकी ती महिलाको एक घण्टापछि मृत्यु भएको निमित्त स्वास्थ्य सेवा व्यवस्थापक रेग्मीले जानकारी दिए । ती महिलाको बच्चा जन्मने मिति नाघिसकेको थियो ।
सुत्केरी हुने मिति २०७७ चैत्र २८ गते रहेको दैलेख अस्पतालले जनाएको छ । बच्चा जन्मने मिति नाघिसकेकाले दैलेख अस्पतालले वैशाख १२ गते नै सुर्खेत रिफर गरिसकेको थियो । यद्धपी परिवारले सुर्खेत नलिइ घरमै राखेको थियो । ‘बच्चा जन्मने मिति नाघिसकेकाले शल्यक्रियामार्फत प्रसूति गराउनुपर्ने हुनसक्छ भनेर हामीले वैशाख १२ गते नै सुर्खेत रिफर गरिसकेका थियौं, आमा र बच्चाको अवस्था राम्रो थियो, दैलेख अस्पतालका डा। जगत थापाले भने । घरपरिवारले हेलचक्राई गरेका कारण गर्भवती महिलाको मृत्यु भएको डा। थापाको भनाइ छ ।
अस्पतालले सुर्खेत रिफर गरेपनि घरमै बसेकी ती महिला शुक्रबार बिहान मात्रै पुःन अस्पताल पुगेकी थिइन् । गम्भीर अवस्थामा अस्पताल ल्याइएकी ती महिलाको मृत्यु भएको हो । मृत्युपछि कोरोना भाइरस (कोभिड–१९) संक्रमणको लक्षणहरु देखिएकाले परीक्षण गर्दा कोरोना संक्रमण पुष्टि भएको हो । एन्टिजेन परीक्षणमा ती महिलालाई कोरोना संक्रमण पुष्टि भएको डा। थापाले बताए ।
