काठमाडौँ । प्यूठानमा जिल्ला क्रिकेट सङ्घ तदर्थ समिति गठन भएको छ ।
मंगलबार प्यूठानको जुम्रीमा जिल्ला खेलकुद विकास समितिका अध्यक्ष श्यामबहादुर थापाको अध्यक्षतामा बसेको बैठकले तेजबहादुर पुनको अध्यक्षतामा ११ सदस्यिय जिल्ला क्रिकेट सङ्घ तदर्थ समिति गठन गरेको हो ।
योसँगै नेपाल क्रिकेट सङ्घ (क्यान) को जिल्ला सदस्यता प्राप्तको लागि प्यूठानलाई पनि बाटो खुलेको छ । निर्विरोध रुपमा गठन भएको समितिको उपाध्यक्षमा सन्दीप श्रेष्ठ, सचिवमा जीवन खनाल र कोषाअध्क्षमा आशिष श्रेष्ठ छन् ।
त्यस्तै, सदस्यहरुमा महेन्द्र विक उमेश घर्तिमगर, मिलन राना, गणेश गिरी, किरण बुढामगर, अमित थापामगर र हुकुम परियार छन् । दुई दशकदेखि सक्रिय रुपमा प्यूठानमा क्रिकेट प्रतियोगिता भएपनि सङ्घ नहुँदा जिल्लामै सिमित भएको थियो ।
जिल्लामा भएको दुई सय भन्दाबढी भेलाले तेजबहादुर पुन सहितको टिमलाई सर्वसम्मत चुनेको हो । तेज जिल्लामा लामो समयदेखि क्रिकेट विकासमा लागि पर्दै आएका एक समर्थक हुन् । अबको आफ्नो उद्देश्य क्यानबाट पूर्ण सदस्यता मान्यता पाउने तेजले बताएका छन् ।
‘हामी सङ्घमा नहुँदा लामो समयदेखि पछि पर्दै आएका थियौँ । जिल्लामा लगातार प्रतियोगिता हुँदै आएका छन् । खेलाडीहरुपनि राम्रो छन् । हामी यसलाई व्यवस्थित गर्दै अघि बढ्ने छौँ’, अध्यक्ष पुनले भने ।
‘अब हामी क्लब दर्तामा ध्यान दिने छौँ । जिल्लामा १० वटा निरन्तर खेल्ने क्लब पनि छन् । त्यसलाई हामी १५ सम्म पुर्याउने छौँ । यसबाट अझ धेरैँ क्रिकेट खेलाडी आउने छन् । हामी नेपालकै एक उदाहरणीय जिल्ला बन्न चाहन्छौँ’, पुनले भने ।
प्यूठानमा ७ गाउँपालिका र २ नगरपालिका रहेका छन् । सबै स्थायिनतहमा क्रिकेट सक्रिय रुपमा रहँदै आएका छन् । गतवर्ष प्रधानमन्त्री कप एकदिवसिय प्रतियोगिताको लागि प्यूठानले प्रदेश छनोट खेल्न दाङसँग सिरिज खेलेको थियो ।
नेपाली क्रिकेट समर्थक समाजको समन्वयमा गतवर्ष जिल्ला छनोट हुँदै दाङसँग मैत्रीपूर्ण सिरिज खेलेको थियो । सङ्घ नहुँदा प्रदेश छनोट खेल्न नपाएपछि दाङसँग सिरिज खेलेको थियो ।
