काठमाडौँ, जेठ २८ । नेपालले आईसीसी विश्वकप लिग-२ त्रिकोणात्मक ओडीआई सिरिजअन्तर्गत दोस्रो खेलमा घरेलु टोली अमेरिकाविरुद्ध पहिला ब्याटिङ गर्ने भएको छ।
ह्युस्टनस्थित मुसा क्रिकेट स्टेडियममा केहीबेरपछि सुरु हुने खेलका लागि नेपाली राष्ट्रिय क्रिकेट टोलीका कप्तान सन्दीप लामिछानेले टस जितेर पहिला ब्याटिङ गर्ने निर्णय गरेका हुन्। नेपाल राष्ट्रिय टोलीका मुख्य प्रशिक्षक पुबुदु दासानायकेले आजको खेलमा तीन परिवर्तन गरेका छन्। विकेटकिपर विनोद भण्डारीसँगै ओपनरद्वय सुवास खकुरेल र सुनील धमला बेन्चमा राखेका छन्।
उनले पहिलो रोजाईका आसिफ शेख, कुशल भुर्तेल र आदिल अन्सारीलाई मौका दिएका छन्। यस प्रतियोगिताको तयारी गर्दै गर्दा उनीहरु घाइते भएका थिए। जसकारण उनीहरुले ओमानविरुद्धको पहिलो खेल गुमाएका थिए।
कुशल र आसिफ टोलीमा फर्किँदा सुनील धमला र सुवास खकुरेललाई बेञ्चमा राखिएको छ। ओमानवविरुद्धको खेलमा ओपनर सुवास ३ रनमा बोल्ड भएका थिए। त्यस्तै, पाँच वर्षपछि सिनियर टोलीमा फर्किँदै ओडीआईमा डेब्यू खेल खेलेका सुनिल ३८ बलमा १२ रन बनाउँदै बोल्ड भएका थिए। आदिलको यो ओडीआईमा डेब्यू खेल हो। उनी नेपाली राष्ट्रिय टोलीमा डेब्यू गर्ने ३२औं खेलाडी हुन्।
