प्युठान। लगातार पाँच खेलमा हार बेहोरेको चेन्नई सुपर किंग्सले अन्ततः इण्डियन प्रिमियर लिग (IPL) २०२५ मा दोस्रो जित हात पारेको छ।
मंगलबार राति सम्पन्न खेलमा चेन्नईले लखनउ सुपर जायन्ट्सलाई ५ विकेटले पराजित गर्दै लिगमा पुनः लय फर्काउने संकेत दिएको छ। लखनउले दिएको १६७ रनको लक्ष्य चेन्नईले १९.३ ओभरमा पाँच विकेट गुमाउँदै पुरा गर्यो।
जितमा शिवम दुबेले अविजित ४३ रनको योगदान दिए भने रचिन रवीन्द्रले ३७ रन र शेख रशीदले २७ रन बनाए। कप्तान महेन्द्र सिंह धोनीले मात्र ११ बलमा चार चौका र एक छक्का प्रहार गर्दै २६ रनको विस्फोटक अविजित पारी खेले र ‘प्लेयर अफ द म्याच’ घोषित भए।
बलिङतर्फ लखनउका रवि विश्नोईले दुई विकेट लिए भने दिग्वेश राठी, आवेश खान र एडन मार्कमले एक–एक विकेट हात पारे।
खेलको सुरुवातमा अटल बिहारी वाजपेयी एकना क्रिकेट स्टेडियममा टस हारेर पहिले ब्याटिङ गरेको लखनउले निर्धारित २० ओभरमा ७ विकेट गुमाएर १६६ रन बनाएको थियो।
