प्युठान। इन्डियन प्रिमियर लिग (आईपीएल) २०२५ को उपाधि रोयल च्यालेन्जर्स बैंगलुरुले हात पर्न सफल भएको छ।
अहमदाबादस्थित नरेन्द्र मोदी स्टेडियममा मंगलबार राति सम्पन्न फाइनल खेलमा पञ्जाब किंग्सलाई ६ रनले पराजित गर्दै बैंगलुरु पहिलो पटक च्याम्पियन बन्न सफल रह्यो ।
टस हारेर पहिले ब्याटिङ गरेको बैंगलुरुले २० ओभरमा ९ विकेटको क्षतिमा १९० रन बनाएको थियो। जवाफी ब्याटिङमा उत्रिएको पञ्जाब किंग्स २० ओभरमा ७ विकेट गुमाएर १८४ रनमा सीमित रह्यो।
जितमा विराट कोहलीले ३५ बलमा ४३ रन बनाए भने रजत पाटीदारले १६ बलमा २६ रन जोड्दै योगदान दिए।
जितेश शर्माको १० बलमा २४ रनको छोटो तर आक्रामक इनिङ जितमा निर्णायक बन्यो। पञ्जाबका लागि अर्शदीप सिंह र जेमिसनले तीन–तीन विकेट लिए।
पञ्जाबको इनिङमा शशांक सिंहले ३० बलमा ६१ रनको अविजित इनिङ खेले पनि टिमलाई जित दिलाउन सकेनन्।
